Bjarni Benediktsson, formaður Sjálfstæðisflokksins, kippir sér lítið upp við það að aðrir ráðherrar tjái sig um mögulegt formannsframboð.
Í ljósi sögulega lágs fylgi Sjálfstæðisflokksins í könnunum og óljós áform Bjarna um hvað hann gerir á næsta landsfundi hafa umræður um mögulegan arftaka hans aukist.
mbl.is hefur spurt alla ráðherra Sjálfstæðisflokksins hvort að þeir hafi hug á því að leiða flokkinn og enginn útilokar neitt.
Þórdís Kolbrún Reykfjörð Gylfadóttir, varaformaður Sjálfstæðisflokksins, hleypti formannsumræðunni hressilega af stað á Sprengisandi á sunnudag er hún sagðist aðspurð vonast til þess að hún myndi leiða flokkinn í næstu kosningum.
Í Morgunblaðinu í gær áréttaði hún þó að hún myndi aldrei fara fram gegn Bjarna á landsfundi, en landsfundur er á dagskrá í febrúar.
„Þegar spurt er „ertu tilbúin að leiða Sjálfstæðisflokkinn?“ er svarið við því já, en það eru enn þá nokkrir mánuðir í næsta landsfund eins og formaðurinn fór yfir í sinni ræðu þannig að það er ekki tímabært að útlista það nánar fyrr en það skýrist,“ sagði Þórdís í samtali við Morgunblaðinu.
Spurður út í þessi ummæli hennar, sem og annarra sem hafa verið spurðir um mögulegt framboð, segir Bjarni:
„Ég heyrði ráðherrann segja að hún myndi ekki fara í framboð gegn formanninum, eigum við ekki að skoða þetta í þessu samhengi? Þarna eru ráðherrar einfaldlega að bregðast við spurningum um þetta efni og ég ætla ekki að setja þeim mikið fyrir í þeim efnum,“ segir hann í samtali við mbl.is.
Guðlaugur Þór Þórðarson, umhverfis-, orku- og loftslagsráðherra, sagði í samtali við mbl.is að nú sé ekki staður og stund til að vera með yfirlýsingar, enda sex mánuðir í landsfund.
„Ég er þakklátur fyrir þann stuðning sem ég fékk á síðasta landsfundi en eins og ég sagði eftir þann fund, þá styðjum við formanninn og ég geri það,“ sagði hann.
Guðlaugur bauð sig fram gegn Bjarna á síðasta landsfundi og hlaut 40,4 prósent atkvæða.
Áslaug Arna Sigurbjörnsdóttir, háskóla-,iðnaðar- og nýsköpunarráðherra, sagði í samtali við mbl.is að hún hefði ekki tekið neina ákvörðun um það hvort hún ætli að bjóða sig fram til formanns Sjálfstæðisflokksins á næsta landsfundi flokksins fari svo að Bjarni sækist ekki eftir endurkjöri.
„Ég hef ekki tekið neina ákvörðun um slíkt. Við erum með formann sem hefur ekki gefið út að hann sé á förum og það er langt í næsta landsfund. Ég hef metnað fyrir Sjálfstæðisflokknum eins og aðrir í forystu hans.“
Guðrún Hafsteinsdóttir dómsmálaráðherra sagði í samtali við mbl.is að hún hefði ekki hugleitt formannsframboð, en hún væri þó að ljúga ef hún segði að þetta væri í fyrsta sinn sem hún væri spurð um mögulegt framboð.
Hún sagðist styðja við Bjarna í sínum störfum sem formaður.
„Það er búið að segja það í mörg ár að hann sé að hætta en sem betur fer er fullt af fólki í Sjálfstæðisflokknum og það er ekki ég eða einhver annar sem tekur ákvörðun hver verður formaður. Það eru flokksmenn í Sjálfstæðisflokknum sem velja sér nýja forystu þegar að þar að kemur.“
Ásdís Kristjánsdóttir, bæjarstjóri Kópavogs, sagði í síðasta þætti Spursmála hún væri ekki að hugsa um formannsframboð í Sjálfstæðisflokknum, að minnsta kosti ekki „eins og sakir standa.“
Aðrir hafa verið nefndir í þessu samhengi eins og til dæmis Elliði Vignisson, bæjarstjóri Ölfuss, Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi og Halldór Benjamín Þorbergsson, fyrrum framkvæmdastjóri Samtaka atvinnulífsins og forstjóri Heima.