Grunnskólarnir byrjaðir en ekkert bólar á aðgerðum
Setja bókamerki
Mennta- og barnamálaráðherra hefur enn ekki kynnt aðgerðaáætlun til að bregðast við niðurstöðum PISA-könnunarinnar, níu mánuðum eftir að þær voru birtar.
Ísland lækkaði mest allra OECD-ríkja í PISA-könnuninni. Sýndu niðurstöðurnar meðal annars að 40% fimmtán ára nemenda á Íslandi búa ekki yfir grunnhæfni í lesskilningi.
Ef horft er á heildarniðurstöður könnunarinnar sést að Ísland er í sjötta neðsta sæti allra OECD-ríkjanna og næstneðst Evrópuríkja.
Búast við verri árangri
Næsta PISA-könnun verður lögð fyrir í haust. Þeir sérfræðingar sem Morgunblaðið og mbl.is hafa rætt við búast við enn verri niðurstöðum en síðast. Að líkindum mun þó líða ár á milli þess sem nemendur taka prófið og þar til niðurstöður úr því berast.
Regluleg lesfimipróf sýna fram á sífellt versnandi lestrarfærni barna eins og Morgunblaðið greindi frá í gær.
Fyrirlagning samræmdu könnunarprófanna misfórst árin 2020 og 2021. Ráðherra ákvað að afnema prófin í kjölfarið. Lesfimiprófin eru því eina samræmda matstækið sem mælir færni meirihluta íslenskra barna.
Mikilvægt að umræðan haldi áfram
Í tilkynningu ráðuneytisins þar sem greint var frá niðurstöðum PISA í desember sagði eftirfarandi:
„Ljóst er af niðurstöðum PISA 2022 að stjórnvöld, sveitarfélög, stofnanir og samtök þurfa að leggjast á eitt við að skilja ástæður þeirrar neikvæðu þróunar í lesskilningi og læsi sem kemur fram í könnuninni og bregðast við.“
Í samtali við mbl.is í sama mánuði sagði ráðherrann Ásmundur Einar Daðason að samfélagið þyrfti að passa sig á því að umræðan um menntamálin færi ekki aðeins hátt í desember heldur þyrfti menntakerfið að vera til umræðu allt árið um kring.
„[V]egna þess að menntamálin skipta okkur gríðarlega miklu máli,“ sagði Ásmundur Einar.
Kynningu frestað fram á haust
Nú, níu mánuðum eftir að niðurstöðurnar lágu fyrir, hafa stjórnvöld enn ekki kynnt neinar sérstakar aðgerðir til að bregðast við niðurstöðunum, eins og heitið var að gera í sumar.
Í tilkynningu 18. júní var fullyrt að ráðuneytið ynni að aðgerðaáætlun til að bregðast við niðurstöðunum í samstarfi við breiðan hóp hagsmunaaðila.
Tekið var fram að áætlunin yrði kynnt til samráðs þremur dögum síðar, föstudaginn 21. júní.
Hrinda átti svo aðgerðunum í framkvæmd við innleiðingu svokallaðs 2. áfanga menntastefnu til ársins 2030, sem fullyrt var að kynna ætti í haust.
Föstudagurinn 21. júní leið án þess að nokkuð heyrðist frá ráðuneytinu. Í skriflegu svari við fyrirspurn mbl.is í júlí kvaðst ráðherra loks hafa frestað kynningu aðgerðaáætlunarinnar fram á haust.
Ótækt að ráðherra sinni ekki lögbundnum skyldum
Ásmundur Einar hefur einnig haldið því fram að hann muni leggja fram skýrslu á haustþingi um framkvæmd skólastarfs í grunnskólum árin 2017 til 2021, í svari við fyrirspurn Morgunblaðsins í ágúst.
Rúm tvö ár eru liðin frá því hann lofaði að skila skýrslunni fyrir árslok 2022. Lögum samkvæmt hefði ráðherra átt að leggja skýrsluna fram í byrjun þess sama árs.
Umboðsmaður barna hefur sagt það ótækt að ráðherra standi ekki skil á lögbundnum skyldum sínum með þessum hætti. Svör ráðherrans, sem bárust í ágúst á síðasta degi fjögurra vikna svarfrests, slógu ekki á áhyggjur umboðsmanns.
Lesfimiprófin nú til endurskoðunar
Staðan er óásættanleg
„Við sem samfélag þolum þetta ekki“
Rauður dregill fyrir Pútín þrátt fyrir ásakanir
„Á ekki að gerast í okkar samfélagi“
Trausti kolfellir sumarið 2024
Einari heitt í hamsi á borgarstjórnarfundi
„Rusladrottningin“ ákærð fyrir glæp gegn umhverfinu