Andlát: Ágúst Óskarsson

Ágúst Óskarsson, íþróttakennari og kaupmaður í Mosfellsbæ, lést föstudaginn 30. ágúst, 75 ára að aldri.

Ágúst fæddist á Sjúkrahúsinu á Akureyri og gekk í barnaskólann Litlu-Laugar, héraðsskólann á Laugum í Reykjadal, Gymnastikhøjskolen í Ollerup í Danmörku 1966-67, Íþróttakennaraskólann á Laugarvatni 1967-68 og Samvinnuskólann á Bifröst 1970-72.

Ágúst hneigðist snemma að íþróttum og byrjaði að kenna sund um 11 ára aldur ásamt því að þjálfa í frjálsum og í knattspyrnu. Þá sá hann um héraðsmót í frjálsum íþróttum fyrir HSÞ og UNÞ. Var hann íþróttakennari við Varmárskóla og Gagnfræðaskólann í Mosfellssveit árið 1968 og sneri aftur til starfa við kennslu í Mosfellssveit árið 1972 að námi loknu.

Árið 1976 stofnaði Ágúst fyrirtækið Á. Óskarsson og rak hann fyrirtækið samhliða kennslu. Árið 1983 hætti Ágúst kennslu og tók við stöðu framkvæmdastjóra íþróttamannvirkja í Mosfellssveit. Að því starfi loknu sneri hann sér alfarið að rekstri fyrirtækisins og gerði allt fram að andláti.

Ágúst var þjálfari hjá fimleikadeild KR, skipulagði og sá um fimleikasýningar á Suður- og Norðurlandi með sameinuðum fimleikaflokki karla hjá KR og Ármanni. Hann var í forsvari fyrir knattspyrnu kvenna hjá Aftureldingu í allmörg ár og hlaut viðurkenningu fyrir þau störf. Hann hlaut einnig viðurkenningu á 50 ára afmæli Varmárlaugar í Mosfellsbæ. Hann var endurskoðandi bæjarreikninga Mosfellsbæjar, meðlimur í Félagi íslenskra stórkaupmanna, nú Félagi atvinnurekenda, meðlimur í Íslensk-kínverska viðskiptaráðinu, félagi í Oddfellowreglunni og meðlimur í Félagi frímerkjasafnara.

Eiginkona Ágústar var Helga Sigurðardóttur skrifstofustjóri, f. 1960, d. 28.8. 2022. Börn Ágústar eru Óskar Örn, Silja Rán og Heiðar Reyr. Útför Ágústar verður auglýst síðar.