Íslenskur maður á þrítugsaldri sem grunaður er um að hafa orðið ungri konu, Sofiu Sarmite Kolsenikovu, að bana á Selfossi í fyrra fannst látinn á Taílandi.
Þetta herma heimildir mbl.is
Málið var á borði Héraðssaksóknara eftir rannsókn lögreglunnar á Selfossi. Ekki hafði verið gefin út ákæra í málinu. Þrátt fyrir ítrekaðar tilraunir til þess að reyna að ná á héraðssaksóknara í morgun, náðist ekki á Karl Inga Vilbergsson, saksóknara í málinu.
Samkvæmt framburði mannsins við lögreglu sagðist hann hafa komið að Sofiu látinni að nóttu til þann 27. apríl í fyrra.
Andlátstilkynningin barst hins vegar lögreglu ekki fyrr en tæpum hálfum sólarhring eftir andlát hennar. Fíkniefni fundust í blóði hennar en einnig voru merki um kyrkingartök á konunni.
Maðurinn var í gæsluvarðhaldi í hálfan mánuð og var úrskurðaður í farbann. Hann var hins vegar ekki í farbanni þegar hann fannst á Tailandi.
Uppfært 12:39: Ægir Þór Eysteinsson, upplýsingafulltrúi utanríkisráðuneytisins, staðfestir að nýlegt andlát Íslendings á Taílandi sé á borði borgaraþjónustu utanríkisráðuneytisins.