Innlent | mbl | 10.9.2024 | 21:33

Ríkisstjórnin treystir á „guð og lukkuna“

Inga Sæland segir ríkisstjórnina auka þenslu í efnahagskerfinu. mbl.is/Arnþór

Inga Sæland, formaður Flokks fólksins, segir nýtt fjárlagafrumvarp fjármála- og efnahagsráðherra sem kynnt var í dag litað af kosningaloforðum.

Hún segir ríkisstjórnina ekki taka ábyrgð á efnahagsástandinu og treysti frekar á „guð og lukkuna til að koma á jafnvægi í efnahagsmálum“.

Sigurður Ingi Jóhannsson, fjármála- og efnahagsráðherra, kynnti í dag nýtt fjárlagafrumvarp fyrir árið 2025 þar sem gert er ráð fyrir að halli ríkissjóðs verði 41 milljarður króna af heildarafkomu ríkissjóðs.

Frétt af mbl.is

Gera ráð fyrir hallinn verði 41 milljarður

Frétt af mbl.is

Fjárlagafrumvarpið í stuttu máli

Koma með blússandi þenslu

Ráðherrann segir að í fjárlögunum séu sköpuð skilyrði fyrir lægri vexti og verðbólgu þar sem fjármunum verði forgangsraðað og lögð áhersla á aðhald í útgjöldum.

Aðspurð segir Inga að ekkert bendi til þess að vextir og verðbólga fari lækkandi með þessum aðgerðum.

„Þeir eru að koma með blússandi þenslu inn í verðbólguna. Þeir ætla að reisa hérna þjóðarhöll og nýtt fangelsi og ef það er skilningur fjármálaráðherra að það komi vel út í baráttunni við verðbólgu og stýrivexti Seðlabankans, þá ætti þessi fjármálaráðherra að finna sér eitthvað annað að gera.“

Frétt af mbl.is

Sigurður: Komumst í mark á næstu mánuðum

Gagnrýnir nýja þjóðarhöll

Spurð hvað hún hefði viljað sjá í frumvarpinu til að draga úr verðbólgu og vöxtum segir Inga:

„Ég myndi aldrei nokkurn tímann boða til krónutöluhækkana og hallabygginga að ýmsum toga og halda þar með áfram að koma með þenslu inn í þetta viðkvæma ástand,“ segir Inga en í téðu fjárlagafrumvarpi munu krónutölugjöld á eldsneyti, áfengi og tóbak hækka um 2,5%.

Þá er gert ráð fyrir að bygging nýs fangelsis í stað Litla-Hrauns og fyrstu skref í átt að byggingu Þjóðarhallar hefjist á næsta ári en áætlaður kostnaður fyrir nýtt fangelsi er 14,4 milljarðar og 15 milljarðar fyrir nýja Þjóðarhöll.