Lögreglan á höfuðborgarsvæðinu stöðvaði í nótt ökumann sem gripinn hafði verið við akstur á 107 km/klst.
Hámarkshraðinn á viðkomandi götu er 50 km/klst.
Í ljós kom að ökumaðurinn hafði þegar verið sviptur ökuréttindum, að því er fram kemur í dagbók lögreglu.
Þá var annar stöðvaður við akstur þar sem lögregla hugðist kanna ástand hans og réttindi til aksturs.
Í ljós kom að viðkomandi var undir áhrifum ávana- og fíkniefna ásamt því að vera grunaður um sölu- og dreifingu fíkniefna, auk annarra umferðarlagabrota.
Maðurinn var vistaður í fangageymslu og þess beðið að hægt sé að ræða við hann vegna málsins.
Alls gista fjórir fangageymslu lögreglu eftir atburði næturinnar, að hennar sögn.