Virkjunarleyfi fyrir Hvammsvirkjun gefið út
Setja bókamerki
Orkustofnun hefur gefið út virkjunarleyfi fyrir Hvammsvirkjun í Þjórsá og er stefnt að því að virkjunin taki til starfa fyrir árslok 2028.
Í kjölfar leyfisins sækir Landsvirkjun um framkvæmdaleyfi til bæði Rangárþings ytra og Skeiða- og Gnúpverjahrepps, en mannvirki tengd virkjuninni verða í báðum sveitarfélögunum.
Þetta kemur fram í tilkynningu frá Landsvirkjun.
Sigölduvirkjun stækkar
Þar segir að Orkustofnun hafi jafnframt gefið út leyfi til stækkunar Sigölduvirkjunar úr 150 MW í 215 MW með því að bæta fjórðu vélinni við. Þar sækir Landsvirkjun um framkvæmdaleyfi til Ásahrepps og Rangárþings ytra.
„Stækkun Sigölduvirkjunar eykur afl og sveigjanleika í raforkukerfinu. Með aflaukningunni eykst orkuvinnslugeta stöðvarinnar aðeins lítillega, nema til komi meira rennsli með aukinni bráðnun jökla eða aukinni úrkomu,“ segir í tilkynningunni og er þá tekið fram að áætlað sé að stækkun verði lokið í lok árs 2027.
Segir þá að Hvammsvirkjun verði 740 GWst, 95 MW að stærð, sem þýðir að hún getur unnið svipaða orku og jarðvarmavirkjunin Þeistareykir á Norðurlandi gerir nú.
Framkvæmdir þurfi að hefjast sem fyrst
Í tilkynningunni kemur fram að Orkustofnun hafi áður gefið út virkjunarleyfi vegna Hvammsvirkjunar í desember 2022. Það hafi hins vegar verið kært til úrskurðarnefndar umhverfis- og auðlindamála.
Var þar öllum álitamálum vísað frá nema einu sem snéri að því að ekki hefði verið tryggt að útgáfa virkjunarleyfisins væri í samræmi við vatnaáætlun, sem gefin hafði verið út í fyrsta skipti í apríl 2022.
Var það niðurstaða nefndarinnar að fella virkjunarleyfið úr gildi en Umhverfisstofa hefur síðan veitt heimild til breytinga á vatnshloti.
„Vegna þeirra tafa sem orðið hafa í leyfisveitingaferlinu þurfa framkvæmdir að hefjast sem allra fyrst, eigi það takmark að nást að stöðin skili orku í árslok 2028. Vegagerðin er langt komin með endurbætur á Hvammsvegi og undirbýr lagningu nýs Búðafossvegar og brúar yfir Þjórsá,“ segir í tilkynningunni.
Er þar enn fremur nefnt að Landsvirkjun muni hefjast handa við gerð aðkomuvegar í framhaldi af Hvammsvegi og gröft frárennslisskurðar, þaðan sem efni fæst í Búðafossveg, fljótlega eftir að framkvæmdaleyfi sveitarfélaganna liggja fyrir.
Einnig verði lagður grunnur að vinnubúðum og lagt veitukerfi fyrir þær og framkvæmdasvæðið allt.
Virkjunarleyfi fyrir Hvammsvirkjun gefið út
„Skulum rétt vona að brautin lokist ekki“
Kærur lagðar fram eftir harkaleg slagsmál
Sakar eigandann um ítrekuð brot
Flugvöll á Hólmsheiði dagaði uppi
Varað við stormi