Frjálsíþróttasamband Íslands og TM munu starfa saman að meistaramóti Íslands í maraþonhlaupi 2024 og fjölskylduhlaupi TM sem verða haldin 26. október.
Þetta kemur fram í fréttatilkynningu.
Þar segir að í haustmaraþoninu verði keppt bæði í heilu og hálfu maraþoni eftir helstu stígum borgarinnar. Hlaupaleiðin er löglega mæld og framkvæmd samkvæmt reglugerðum Frjálsíþróttasambands Íslands.
Þá verði jafnframt fjölskylduhlaup TM sem sé um tveggja kílómetra skógarhringur í Elliðaárhólmanum fyrir börn og fjölskyldur. Þátttaka standi öllum til boða og sé gjaldfrjáls.
Fram kemur að notast verði við sama start- og marksvæði og í maraþoninu og allir þátttakendur fái verðlaun.
Fríða Ásgeirsdóttir, framkvæmdastjóri markaðsmála og sölu hjá TM, segir fyrirtækið spennt og stolt að geta stutt við hreyfingu landsmanna og Frjálsíþróttasambandið.
„TM styrkir á hverju ári ýmis málefni sem geta haft jákvæð áhrif á samfélagið og hefur áhersla verið lögð á íþróttastarf, sér í lagi fyrir börn og unglinga. Við hlökkum sérstaklega til Fjölskylduhlaupsins, þar sem börn og fullorðnir geta gert sér glaðan dag saman í fallegri hlaupaleið í skóginum. Við lofum miklu fjöri,“ er haft eftir henni í tilkynningunni.
„Við hjá FRÍ erum sérlega ánægð með samstarfið. Í þessum viðburði tengjum við saman allan aldursskalann, í einstöku umhverfi Elliðaárdalsins. Þá er ekki síður gleðilegt að svo öflugur samstarfsaðili eins og TM deili með okkur áhuganum á að efla hlaup á Íslandi,“ er haft eftir Friðleifi Friðleifssyni, hjá Frjálsíþróttasambandi Íslands, í tilkynningunni.