Lögreglunni á höfuðborgarsvæðinu barst tilkynning um mann í miðbæ Reykjavíkur veifandi hníf.
Nokkuð góð lýsing barst af manninum og fannst hann stuttu seinna. Hann var ekki með hníf á sér en var hugsanlega búinn að losa sig við hann.
Þetta kemur fram í dagbók lögreglunnar á höfuðborgarsvæðinu vegna verkefna frá klukkan 5 í morgun til kl. 17 í dag.
Brotist var inn í verslun í miðbæ Reykjavíkur. Eitthvað var tekið af munum og er málið í rannsókn.
Tilkynnt var um reiðhjólaþjófnað sem náðist á upptöku. Þjófurinn þekktist á upptökunni og er málið í rannsókn.
Einnig barst tilkynning um innbrot í heimahús og er það mál einnig í rannsókn.
Þá var kvartað yfir hávaða vegna framkvæmda og var lofað að hætta vinnu og byrja aftur klukkan 10.