Karlmaðurinn sem grunaður er um að hafa banað dóttur sinni hefur verið úrskurðaður í gæsluvarðhald til 24. september. Þetta kemur fram í tilkynningu frá lögreglunni á höfðuborgarsvæðinu.

„Íslenskur karlmaður á fimmtugsaldri var í dag í Héraðsdómi Reykjaness úrskurðaður í gæsluvarðhald til þriðjudagsins 24. september að kröfu Lögreglunnar á höfuðborgarsvæðinu í þágu rannsóknar hennar á andláti ungrar stúlku um kvöldmatarleytið í gærkvöld. Maðurinn er faðir áðurnefndrar stúlku, sem var 10 ára, og er hann grunaður um að hafa orðið henni að bana,“ segir í tilkynningunni.

Var í byrjun óljós um atvik og staðsetningu

Þá kemur fram að maðurinn hafi sjálfur hringdi í Neyðarlínuna til að komast í samband við lögreglu.

„Hann var í byrjun óljós um bæði atvik og staðsetningu. Eftir nokkra stund fékkst skýrari mynd af málinu og þá um leið voru viðbragðsaðilar sendir á staðinn, sem reyndist vera í hrauninu gegnt Vatnsskarðsnámu við Krýsuvíkurveg.

Þar var maðurinn handtekinn á sama tíma og leitað var að stúlkunni, en hún fannst skammt frá. Strax voru hafnar endurlífgunartilraunir, en þær báru því miður ekki árangur og var stúlkan úrskurðuð látin á vettvangi.“

Loks segir að lögreglan á höfuðborgarsvæðinu hafi notið aðstoðar sérsveitar ríkislögreglustjóra við aðgerðina.

Áður komist í kast við lögin

Maðurinn sem um ræðir er 45 ára en hann hefur áður komist í kast við lögin.

Fyrir nær tveimur áratugum var hann dæmdur í tæplega fjögurra ára fangelsi fyrir innflutning á umtalsverðu magni harðra fíkniefna.

Rúmum áratugi síðar var maðurinn aftur dæmdur fyrir fíkniefnalagabrot, þá fyrir að hafa haft í vörslu sinni nokkuð magn af kannabisplöntum og maríjúana.

Tengdar fréttir

Manndráp við Krýsuvíkurveg

Feðginin áttu í eðlilegum samskiptum

• Grunaður um að hafa banað dóttur sinni
• Tengist ekki árásinni á Menningarnótt
• Grunaður um að hafa myrt stúlku á grunnskólaaldri

• Blogga um frétt