Andlát: Sigurður Björnsson

Sigurður Björnsson, krabbameinslæknir og fyrrverandi formaður Krabbameinsfélags Íslands, lést á Landspítalanum í Fossvogi í gær, 29. september, 82 ára að aldri. Sigurður fæddist 5. júní 1942 í Princeton í New Jersey í Bandaríkjunum. Hann var sonur dr. Björns Sigurðssonar, læknis og forstöðumanns á Keldum (1913-1959), og Unu Jóhannesdóttur fulltrúa (1913-2000). Þau voru bæði úr Skagafirði.

Sigurður varð stúdent frá Menntaskólanum í Reykjavík vorið 1961 og lauk embættisprófi frá læknadeild Háskóla Íslands árið 1968. Að loknu kandídatsári fór Sigurður til framhaldsnáms í Bandaríkjunum og lauk sérfræðiprófi í almennum lyflækningum 1973 og í lyflækningum krabbameina tveimur árum síðar.

Eftir að Sigurður kom heim frá námi árið 1978 starfaði hann á Landspítala, St. Jósefsspítala á Landakoti og Borgarspítala. Hann lauk störfum sem yfirlæknir á Landspítala árið 2014 en var áfram sérfræðilæknir í Læknasetrinu til ársins 2021. Sigurður var formaður Krabbameinsfélags Íslands árin 1998 til 2008 en hann hafði verið í stjórn félagsins frá árinu 1980 og tók þar þátt í að koma ýmsum mikilvægum verkefnum á fót.

Árið 2005 var Sigurður sæmdur riddarakrossi hinnar íslensku fálkaorðu fyrir störf í þágu krabbameinslækninga. Hann var kjörinn í heiðursráð Krabbameinsfélagsins 2008 og sæmdur gullmerki félagsins. Jafnframt sinnti Sigurður stundakennslu á háskólastigi og lét til sín taka á opinberum vettvangi með skrifum um sérsvið sitt í læknisfræði.

Eftirlifandi kona Sigurðar er Rakel Valdimarsdóttir hjúkrunarfræðingur. Sigurður á þrjú börn frá fyrra hjónabandi, þau Kristínu, Björn Pétur og Signýju Sif.
Barnabörnin eru níu og langafabörnin tvö. Börn Rakelar eru tvö frá fyrra hjónabandi, þrjú barnabörn og eitt langömmubarn.