Tveir þriggja sakborninga sem grunaðir eru um stórfelld tollalagabrot með því að smygla inn sígarettum og tóbaki til Íslands á árunum 2015-2018 neituðu sök þegar málið var þingfest í Héraðsdómi Reykjaness í morgun. Þriðji maðurinn er erlendis og mun taka afstöðu til sakargifta síðar.
Eru mennirnir sagðir hafa skráð vörurnar sem prótín og pappír á tollskýrslum. Um er að ræða í heildina 120.075 karton af sígarettum eða 1.200.750 sígarettupakka og 5.400 karton af reyktóbaki.
Fyrirtækið sem flutti tóbaksvörurnar til landsins heitir Áfengi og tóbak ehf. Það er í eigu annars ákærðu, Snorra Guðmundssonar, sem oft er kenndur við rafrettuverslunina Póló. Auk hans er Sverrir Þór Gunnarsson, sem kenndur hefur verið við rafrettuverslunina Drekann, í forsvari fyrir félagið, en hann hafði stofnað Áfengi og tóbak (sem þá hét Tóbaksfélag Íslands ehf.) í gegnum félag sitt Urriðafoss ehf., en það félag rekur núna Drekann.
Auk þeirra er þriðji maðurinn ákærður í málinu sem starfsmaður flutningafyrirtækisins Thor shipping, en samkvæmt ákæru eru Sverrir og Snorri sagðir hafa komið því til leiðar við starfsmanninn að tilgreina rangar vörutegundir á aðflutningsskýrslum fyrir tollafgreiðslu.