Innlent | mbl | 30.9.2024 | 12:47 | Uppfært 16:47

Svona vilja stjórnvöld bregðast við PISA

Ásmundur Einar Daðason, ráðherra málaflokksins. mbl.is/Karítas

Aukin áhersla í menntakerfinu á loftslagsmál og sjálfbærni, þróun námsframboðs, fjölgun kennara, meiri íslenskufærni starfsfólks sem vinnur við uppeldi og menntun barna, safn vandaðra almennra skimunartækja til notkunar í skólum.

Þetta eru meðal 20 aðgerða í lauslega orðuðum drögum að 2. aðgerðaáætlun menntastefnu stjórnvalda til árins 2030, sem afhent voru á menntaþingi rétt í þessu. Með aðgerðunum á meðal annars að bregðast við slökum árangri íslenskra grunnskólanema í PISA-könnuninni árið 2022, en sá árangur kom í ljós fyrir nær tíu mánuðum.

Með drögunum er einnig kallað eftir endurgjöf frá gestum þingsins um þessar aðgerðir ásamt verkþáttum sem ráðuneytið muni kynna í hópvinnu.

Frétt af mbl.is

Tíu mánaða viðbragðstími

Fimm mismunandi flokkar

Aðgerðunum er skipt niður í fimm mismunandi flokka: Hæfni fyrir framtíðina, kennsla í fremstu röð, jöfn tækifæri fyrir alla, vellíðan í öndvegi og gæði í forgrunni.

Í flokknum hæfni fyrir framtíðina er kveðið á um fjórar aðgerðir sem felast í stefnu um stafrænar lausnir í skólastarfi, sjálfbærni og loftslagsmál í menntun, þróun námsframboðs framhaldsskóla og stafræna borgarvitund í menntun og áherslu á miðlalæsi.

Í flokknum kennsla í fremstu röð er lögð áhersla á fjölgun kennara, íslenskufærni starfsfólks sem vinnur við uppeldi og menntun barna, öfluga kennara og stuðning og ráðgjöf við nám og kennslu.

Frétt af mbl.is

„Eitthvað þarf að gera strax“

Aðalnámskrá endurskoðuð

Í flokknum jöfn tækifæri fyrir alla er kveðið á um fjórar aðgerðir. Þær fela í sér samræmt verklag um móttöku, menntun og inngildingu barna með fjölbreyttan tungumála- og menningarbakgrunn, eflingu námsgagnaútgáfu, öflugt samráð við börn og ungmenni um menntamál og menntaþing um leikskólastigið.

Í flokknum vellíðan í öndvegi leggja stjórnvöld áherslu á innleiðingu heildstæðrar löggjafar um inngildandi menntun og skólaþjónustu, safn vandaðra og almennra skimunartækja, vellíðan í skóla- og frístundastarfi og að námsumhverfi barna styðji við farsælt nám og vellíðan.

Að lokum er það flokkurinn gæði í forgrunni. Þar er kveðið á um mikilvægi menntatölfræði og að bæta upplýsingaöflun ríkis og sveitarfélaga um skólahald og líðan, að endurskoða aðalnámskrá leik-, grunn,- framhalds- og tónlistarskóla, endurskoða mat og eftirlit með skólastarfi og að bæta námsárangur í alþjóðlegum samanburði.