Landsmönnum fjölgaði um á þriðja þúsund

Alls bjuggu 386.970 manns á Íslandi í lok annars ársfjórðungs 2024. Þar af voru 198.360 karlar, 188.420 konur og kynsegin/annað voru 180.

Landsmönnum fjölgaði um 2.230 á ársfjórðungnum. Á höfuðborgarsvæðinu bjuggu 246.770 manns en 140.200 á landsbyggðinni. Erlendir ríkisborgarar voru 65.870 eða 17,0% af heildarmannfjöldanum, að því er segir í tilkynningu Hagstofunnar.

Á öðrum ársfjórðungi fæddust 1.090 börn en 640 einstaklingar létust.

Á sama tíma fluttust 1.780 einstaklingar til landsins umfram brottflutta og skiptist það jafnt á milli karla og kvenna (890).

Aðfluttir einstaklingar með íslenskt ríkisfang voru 180 umfram brottflutta en aðfluttir erlendir ríkisborgarar voru 1.600 fleiri en þeir sem fluttust frá landinu.

• Blogga um frétt