Bifreið var ekið út af vegi í Laugardalnum í dag og endaði hún ofan í veituskurði.
Engin meiðsli urðu á fólki og var málið afgreitt á vettvangi, að því er fram kemur í dagbók lögreglunnar á höfuðborgarsvæðinu.
Dagbókin nær yfir tímabilið frá klukkan 5 í morgun til klukkan 17 í dag.
Þar segir að ein hafi verið handtekin vegna líkamsárásar í miðbæ Reykjavíkur.
Ökuréttindalaus ökumaður var stöðvaður fyrir að aka yfir á rauðu umferðarljósi í Hlíðunum og var annar ökumaður sömuleiðis stöðvaður réttindalaus í sama hverfi.
Lögreglu barst tilkynning um líkamsárás í Kópavogi. Áverkar voru ekki alvarlegir.
Þá var maður í annarlegu ástandi handtekinn en tilkynnt hafði verið um húsbrot og eignarspjöll.