Dönsku konungshjónin tóku vel á móti Höllu

Halla Tómasdóttir, forseti Íslands, og Björn Skúlason, eiginmaður hennar, hófu opinbera heimsókn sína til Danmerkur í morgun. Hefð er fyrir því að fyrsta ríkisheimsókn nýs forseta sé til Danmerkur.

Þór­dís Kol­brún Reyk­fjörð Gylfa­dótt­ir ut­an­rík­is­ráðherra er einnig með í för ásamt op­in­berri sendi­nefnd.

Þegar Halla steig á danska grundu við gömlu tollbúðina við Kastellet tóku þau Friðrik 10. Danakonungur og María drottning á móti henni og Birni.  

Að baki konungshjónunum stóð röð hesta og á þeim sátu menn úr hirð konungs. Halla byrjaði á því að heilsa Friðriki og tók síðan í hönd Maríu, sem baðst afsökunar á grámóskulegu veðrinu í Kaupmannahöfn. Vel fór á með þeim öllum. 

Því næst tóku þau í hendurnar á fólki sem beið við bryggjuna í tveimur röðum og voru nær allir með síma eða myndavél á lofti.

Að því loknu stigu þau upp í hestvagn sem ók með þau á brott.