Tilkynnt um tvo hvítabirni á Austurlandi

Þyrla Landhelgisgæslunnar var kölluð út að beiðni lögreglunnar á Austurlandi vegna gruns um að tveir hvítabirnir séu á ferð um hálendið við Laugarfell, norðaustan við Snæfell. 

Þetta staðfestir Ásgeir Erlendsson, upplýsingafulltrúi landhelgisgæslunnar, í samtali við mbl.is. 

Þyrlan átti að vera kominn á staðinn um klukkan sjö. 

Að því er Ríkisútvarpið greinir frá barst tilkynning frá tveimur erlendum ferðamönnum um að þeir hefðu séð tvo hvítabirni á staðnum.

Hafa engin ummerki fundið

Að sögn Kristjáns Ólafs Guðnasonar, yfirlögregluþjóns lögreglunnar á Austurlandi, hafa engin ummerki um hvítabirni sést í leit lögreglunnar á svæðinu. Einnig voru vefmyndavélar Landsvirkjunar kannaðar og sáust engar vísbendingar um hvítabirni sömuleiðis.

„Við bíðum núna eftir þyrlunni sem getur farið yfir stórt svæði á skömmum tíma og er búin hitamyndavél. Ef ekkert finnst hjá þyrlunni þá verður staðan metin og ákvörðun um framhald leitar tekin í kjölfarið.“

Fréttin hefur verið uppfærð.

• Blogga um frétt