Sextán ára drengur var handtekinn í miðbænum fyrir að miða skammbyssu að lögreglumanni. Drengurinn var færður á lögreglustöð þar sem foreldrar komu og sóttu hann. Byssan reyndist hins vegar vera eftirlíking af skammbyssu.
Þetta kemur fram í dagbók lögreglu þar sem greint er frá verkefnum lögreglu frá klukkan 17 í gær til 05 í morgun.
Þá var einn maður handtekinn í hverfi 105 vegna gruns um fíkniefnamisferli, en hann var látinn laus að lokinni skýrslutöku.
Í hverfi 108 var ökumaður stöðvaður í akstri vegna gruns um akstur undir áhrifum fíkniefna. Við leit á ökumanni reyndist hann hafa meint fíkniefni í fórum sínum. Hann var látinn laus að lokinni blóðsýnatöku.
Í miðbæ Reykjavíkur og Hafnarfirði var tilkynnt um menn sem höfðu dottið á hopphjóli. Þeir fengu báðir skurð á höfuðið og voru fluttir á bráðamóttöku til skoðunar. Í dagbókinni kemur fram að þeir hafi báðir verið sjáanlega undir áhrifum áfengis.
Í Kópavogi var tilkynnt um líkamsárás. Gerandi er ókunnur, en brotaþoli hlaut minniháttar meiðsli.