Spretthópur skoðar mál Grímseyjar

Bjarkey Olsen matvælaráðherra íhugar nú að stofna spretthóp til að bregðast við viðkvæmri stöðu byggðar í Grímsey. Hún segir það sannarlega vera vilja sinn að halda byggð um allt land, ekki síst í eyjunni þar sem byggð hefur verið frá landnámi.

Fjórar fjölskyldur hafa auglýst hús sín til sölu og enn fleiri íhuga að yfirgefa eyjuna eftir að í ljós kom að útgerðunum í byggðarlaginu verður ekki veitt undanþága frá vinnsluskyldu í tengslum við byggðakvóta.

Frétt af mbl.is

Hópur íbúa hyggst yfirgefa Grímsey

Frétt af mbl.is

Byggðastofnun getur ekki veitt undanþágu

Telja útgerðarmennirnir það ekki standa undir kostnaði að koma á fót fiskverkun í eyjunni sem myndi uppfylla öll skilyrði.

Að sögn Bjarkeyjar mat Byggðastofnun það svo að ekki væri lengur unnt að veita undanþáguna. „Það væri betra að allir aðilar sætu við sama borð og töldu þau ekki hægt að mismuna landsmönnum með þeim hætti sem verið hefur og Grímseyingar þyrftu að lúta sömu lögmálum og aðrir þegar kemur að úthlutun byggðakvóta.“

Byggðastofnun segir það hvorki falla undir verksvið né valdsvið stofnunarinnar að gefa út reglugerð til að veita undanþágur. Það sé hlutverk matvælaráðuneytisins.

Í byrjun árs voru íbúar í Grímsey 57 talsins, samkvæmt Hagstofunni. Mun færri eru þar með fasta búsetu yfir árið, eða í kringum 20 manns, flestir sjómenn.