Innlent | mbl | 13.10.2024 | 17:15

Ungt Framsóknarfólk segir ákvörðunina „heigulshátt“

Gunnar Ásgrímsson, formaður Sambands ungra Framsóknarmanna. Ljósmynd/Aðsend

„Ungu Framsóknarfólki blöskrar ákvörðun formanns Sjálfstæðisflokksins um að slíta ríkisstjórnarsamstarfi á þessum tímapunkti og leitast við að ganga til kosninga í nóvember. Okkur þykir þetta heigulsháttur, þetta er gert með hagsmuni hans flokks í huga umfram hagsmuni þjóðarinnar.“

Þetta kemur fram í ályktun stjórnar Sambands ungra Framsóknarmanna um ákvörðun Bjarna Benediktssonar forsætisráðherra.

„Það er stór ákvörðun að gefa kost á sér til þess að vera málsvari kjósenda í fjögur ár á þingi og henni fylgir mikil ábyrgð. Hvað þá þegar fólki hlotnast sá heiður að taka þátt í ríkisstjórn þar sem þau hafa frekara tækifæri til þess að móta framtíð þjóðarinnar,“ segir í ályktuninni.

Frétt af mbl.is

Ríkisstjórnin sprungin

Sorglegt að ráðherra taki ekki ábyrgðinni alvarlega

„Það er sorglegt að forsætisráðherra og samflokksfólk hans taki þeirri ábyrgð ekki alvarlegar en raun ber vitni.“

Þá segir jafnframt að slit á ríkisstjórnarsamstarfi eigi að vera „neyðarventill“ og eigi að nota þegar aðstæður skapast þar sem ómögulegt sé að halda áfram. Stjórnarslit séu ekki björgunarbátur til að hoppa í þegar skoðanakannanir eru flokkum óhagstæðar eða menn þurfa að miðla málum í ríkisstjórnarsamstarfi.

„Efnahagsmálin eru loksins að komast á réttan kjöl og vextir byrjaðir að lækka. Þá er það gjörsamlega óábyrgt að stefna því í hættu með því að skapa hér pólitíska óvissu.

Við hræðumst ekki kosningar og teljum að verk þingmanna og ráðherra Framsóknar tali fyrir sig sjálf,“ segir í ályktuninni að lokum.