Innlent | mbl | 14.10.2024 | 11:45 | Uppfært 14:13

„Ekki endilega gleggsti stjórnmálaskýrandi í landinu“

Logi Einarsson, formaður þingflokks Samfylkingarinnar. mbl.is/Kristinn Magnússon

Logi Einarsson, formaður þingflokks Samfylkingarinnar, segir kosningar blasa við þjóðinni og að Samfylkingin sé vel í stakk búin til fara í þær.

„Við höfum eytt síðustu tveimur árum í að heimsækja fólk á hundruðum funda út um allt land og leggja drög að stefnu í heilbrigðismálum, samgöngu- og atvinnumálum og húsnæðis- og kjaramálum. Við hlökkum til og gleðjumst að þjóðin fái núna tækifæri til segja sína skoðun og kjósa nýtt upphaf,“ segir Logi við mbl.is.

Frétt af mbl.is

„Nýtt upphaf“ eða „meira af því sama“

Ríkisstjórnarsamstarfi Sjálfstæðisflokksins, Framsóknar og Vinstri grænna var slitið í gær og líklegt er að þingkosningar verði haldnar 30. nóvember, að því gefnu að Halla Tómasdóttir, forseti Íslands, samþykki þingrofsbeiðni Bjarna Benediktssonar forsætisráðherra sem hann lagði fyrir forsetann í morgun.

Stilla upp sigurstranglegum listum

Logi segir að Samfylkingin muni eyða næstu dögum í að stilla upp sigurstranglegum listum en að hans mati sé ekki svigrúm til að fara út í prófkjör hjá flokkunum.

Frétt af mbl.is

„Gæti ekki verið meira sama um alla spekingana“

Spurður út í atburðarásina í gær þegar Bjarni Benediktsson forsætisráðherra boðaði skyndilega til fréttamannafundar og greindi frá því að ríkisstjórnarsamstarfinu væri lokið segir Logi:

„Ég hef enga skoðun á því. Þetta er þeirra verkefni, vandamál og úrlausnarefni. Við í stjórnarandstöðunni getum lítið annað gert heldur en að halda okkur við veruleikann eins og hann birtist.“

Áttir þú ekki von á því að þetta myndi gerast á einhverjum tímapunkti?

„Ég er nú ekki endilega gleggsti stjórnmálaskýrandi í landinu og hef bara ekkert verið að velta þessu fyrir mér,“ segir Logi.

Samfylkingin er sá flokkur sem hefur mælst með langmesta fylgið í skoðanakönnunum undanfarna mánuði og segir Logi að Samfylkingin sé bjartsýn og hnarreist.

„Það er mjög gleðilegt að fólk fái að kjósa eftir allar þessar ömurlegu uppákomur á stjórnarheimilinu undanfarna mánuði,“ segir þingflokksformaður Samfylkingarinnar.