Skjálftahrina á Reykjaneshryggnum

Töluverð jarðskjálftavirkni var á Reykjaneshryggnum í nótt en á annan tug skjálfta mældist nálægt Eldey.

Stærsti skjálftinn mældist 3 að stærð á öðrum tímanum í nótt en upptök hans voru á 9,4 km dýpi um 2,2 km norðvestur af Eldey.

„Það var smá skjálftahrina við Eldey í nótt en henni er lokið núna. Það voru engir skjálftar sem fundust í byggð,“ segir Jóhanna Malen Skúladóttir, náttúruvársérfræðingur á Veðurstofu Íslands, við mbl.is.

Það var skjálftahrina á Reykjeshryggnum í nótt. Kort/Veðurstofa Íslands

Hún segir að reglulega komi jarðskjálftahrinur á flekaskilunum á Reykjaneshryggnum.

Í gærmorgun mældust tugir skjálfta við Herðubreið. Sá stærsti var 2,2 að stærð samkvæmt yfirförnum niðurstöðum Veðurstofu Íslands.

Frétt af mbl.is

Tugir skjálfta við Herðubreið

„Þetta var nokkuð dugleg hrina vestanmegin við Herðubreið í gær en henni er lokið. Við höfum fengið hrinur á svipuðum slóðum nokkuð reglulega og þær voru áberandi í fyrrasumar,“ segir Jóhanna Malen.

Rólegt við Sundhnúkagígaröðina

Spurð út í stöðuna við Sundhnúkagígaröðina segir hún að þar sé lítið að gerast sem stendur og aðeins hafi mælst tveir skjálftar við kvikuganginn síðasta sólarhringinn.

„Það er enn þá kvikusöfnun í Svartsengi og við verðum bara að bíða og sjá,“ segir náttúruvársérfræðingurinn og bætir því við að það sé ekkert að fara að draga til tíðinda á þessu svæði á næstunni.

• Blogga um frétt