„Einar, er ekki bara best að hlusta á kennara!!!“

Kennarar í reykvískum grunnskólum hafa fjölmennt fyrir utan ráðhús Reykjavíkur til að mótmæla ummælum sem Einar Þorsteinsson borgarstjóri lét falla á fjármálaráðstefnu sveitarfélaga.

„Einar, er ekki bara best að hlusta á kennara!!!“ segir á einu skilti mótmælanda.

Inni í ráðhúsinu stendur yfir borgarstjórnarfundur. Ekki er þó víst að Einar heyri kröfur kennara þar sem hann er í Mexíkó þessa stundina. Til stóð að Dagur B. Eggertsson, fyrrverandi borgarstjóri og formaður borgarráðs, myndi ræða við mótmælendur í fjarveru Einars.

Beiðni Mörtu Guðjónsdóttur, borgarfulltrúa Sjálfstæðisflokksins, um að gera hlé á fundarsköpum var þó samþykkt svo borgarfulltrúar gætu rætt við kennara.

Frétt af mbl.is

Á ekki orð yfir ummælum borgarstjóra

mbl.is/Eggert Jóhannesson

„Því fer fjarri“

Ummæli Einars sem vöktu úlfúð meðal kennara eru eftirfarandi: 

„Mér finnst ein­hvern veg­inn öll „statistic“ bara um skól­ana okk­ar benda til þess að við séum að gera eitt­hvað al­gjör­lega vit­laust. Að kenn­ar­arn­ir séu að biðja um það að fá að vera minna með börn­um en eru samt veik­ari en nokkru sinni fyrr og kenna minna og fleiri ein­hverj­ir und­ir­bún­ings­tím­ar.“

Borgarstjórinn birti í gærkvöldi grein á Vísi þar sem hann sagði að honum þætti leitt að þeir hefðu túlkað orð hans þannig að hann bæri ekki virðingu fyrir þeirra störfum. „[Þ]ví fer fjarri.“

Kennarar fjölmenntu við ráðhúsið. Ljósmynd/Aðsend

Gengu út úr kennslustofum 

Dæmi eru um að kennarar hafi gengið út úr kennslustofum og fengu foreldrar nemenda í sumum skólum í Reykjavík orðsendingu þess efnis að kennsla myndi falla niður. 

Samkvæmt heimildum mbl.is eru ekki kennarar úr öllum skólum í Reykjavík sem taka þátt í aðgerðunum. Í einhverjum tilfellum voru skólastjórnendur á báðum áttum hvort kennurum væri heimilt að ganga út. Óháð því ákváðu margir skólastjórnendur að heimila útgönguna.

Í einhverjum skólum var kennsla felld niður en í öðrum var ákveðið að gera það ekki. Helgast það af því að misjafnt var hve margir kennarar fóru á staðinn til að mótmæla. Í sumum tilfellum fóru það margir að ekki var hægt að halda uppi kennslu. 

„Einar, er ekki bara best að hlusta á kennara!!!“ segir á einu skilti mótmælenda. Ljósmynd/Aðsend

• Blogga um frétt