Fari alþingiskosningar fram annaðhvort 23. eða 30. nóvember næstkomandi, eins og allt bendir til, verður það í annað sinn frá því Ísland fékk fullveldi árið 1918 að þingkosningar eru haldnar í nóvember.

Það gerðist áður árið 1919 í kjölfar þess að Alþingi samþykkti frumvarp til stjórnarskrár konungsríkisins Íslands fyrr á árinu. Í kjölfarið var þing rofið í lok september og alþingiskosningar fóru fram 15. nóvember. Ekki er hægt að ráða af blaðafréttum á þessum tíma að veður hafi verið til trafala í kosningunum.