Óli Björn Kárason, þingmaður Sjálfstæðisflokksins, segist skilja sáttur við þingflokkinn en hann tilkynnti fyrr í dag að hann hygðist ekki sækjast eftir endurkjöri. Hann segir ákvörðunina ekki tengjast því að varaformaðurinn þrengi að frambjóðendum í Suðvesturkjördæmi.
„Ég held að það sé gott fyrir alla og heilbrigt að þekkja sinn vitjunartíma, og hætta áður en fólk fer að krefjast þess að þú hættir,“ segir Óli Björn í samtali við mbl.is spurður hvers vegna hann gefi ekki aftur kost á sér á ný.
Óli, sem er 64 ára, hefur verið alþingismaður Suðvesturkjördæmis frá árinu 2016 en verið í Sjálfstæðisflokknum frá unglingsaldri.
„Það er ánægjulegt að viðbrögðin sem ég fæ eru þvert á móti hvatning um að endurskoða þessa ákvörðun. En hún stendur og hefur legið fyrir töluvert lengi,“ segir Óli enn fremur.
En Óli er alls ekki að hætta í flokknum. Varla að hætta í pólitík.
Hann ætlar nefnilega halda áfram að vinna í „bakvarðasveit“ flokksins, eins og hann orðaði það í grein sem hann birti á xd.is í dag.
„Ég mun vera hér á fullu í þessari kosningabaráttu,“ segir Óli en gengið er til kosninga þann 30. nóvember, eins og kom fram í máli Höllu Tómasdóttur forseta í gær.
Ljóst er að fylgi Sjálfstæðisflokksins hefur dalað verulega á síðustu árum og hefur fylgið mælst um 14% að undanförnu.
Óli Björn var þingflokksformaður frá kosningum 2021 fram í september 2023 en þá tók Hildur Sverrisdóttir við af honum.
Aðspurður neitar hann því að ákvörðunin tengist því að varaformaður flokksins, Þórdís Kolbrún R. Gylfadóttir utanríkisráðherra, sækist eftir 2. sæti í hans kjördæmi – en ekki í Norðvesturkjördæmi sem er hennar heimavöllur.
„Ég fer sáttur við félaga mína, mjög, og sérstaklega við sjálfan mig og menn og málefni,“
Óli Björn tilkynnti sína ákvörðun nefnilega skömmu áður en Þórdís lýsti því yfir að hún sæktist eftir 2. sætinu. Í prófkjörinu mun hún því keppa við Jón Gunnarsson, fyrrverandi dómsmálaráðherra, sem hyggst einnig bjóða sig fram í 2. sæti.
Búast má við því að Bjarni Benediktsson formaður sækist eftir 1. sæti í kjördæminu.
Rósa Guðbjartsdóttir, bæjarstjóri Hafnarfjarðar, segist einnig íhuga alvarlega að bjóða sig fram á lista flokksins í kjördæminu, og þá ofarlega.
Það er því ljóst að færri komast að en vilja í prófkjöri flokksins í Suðvesturkjördæmi, sem hefur á liðnum árum verið helsta vígi Sjálfstæðismanna.