Möguleiki á kosningagosi
Setja bókamerki
„Það væri nú eitthvað ef við fengjum kosningagos en það er alveg möguleiki,“ segir Benedikt Gunnar Ófeigsson, fagstjóri aflögunarmælinga á Veðurstofu Íslands, spurður út í stöðu mála á Sundhnúkagígaröðinni.
Benedikt hefur sagt að mögulega geti farið að draga til tíðinda á Reykjanesskaga á nýjan leik um miðjan nóvember en boðað verður til kosninga laugardaginn 30. nóvember.
Hægt á landrisi og dregið úr kvikuinnflæði
„Við sjáum alveg að skýrt landris heldur áfram í Svartsengi þó svo að vísbendingar séu um að það hafi hægt örlítið á hraða þess og dregið úr kvikuinnflæði,“ segir Benedikt.
Nákvæmlega hvað þetta þýðir segir hann erfitt að segja til um og of snemmt sé að túlka hvað þetta geti þýtt upp á framhaldið.
Síðasta eldgosi lauk 5. september og stóð það yfir í tvær vikur. Það var það þriðja lengsta af þeim gosum sem hafa orðið á Sundhnúkagígaröðinni frá því í desember 2023 en var um leið það kraftmesta.
Benedikt sagði í samtali við mbl.is upp úr miðjum september að við gætum verið róleg alveg fram í miðjan nóvember. Núna segist hann meta stöðuna á svipaðan hátt.
„Það er ólíklegt að það gerist eitthvað mikið fyrr en um miðjan nóvember. Væntanlega förum við að koma út með fréttatilkynningar í byrjun nóvember um að kerfið sé farið að nálgast þau rúmmálsmörk sem það náði fyrir síðasta gos og munum þá benda á að það fari að styttast í einhverja atburðarás,“ segir Benedikt.
Tíminn að lengjast á milli gosa
Benedikt segir að það þurfi alveg að gera ráð fyrir því að bíða lengi, jafnvel fram í desember eða fram á næsta ár, þar til eitthvað gerist. Hann segir þróunina hafa verið þannig að tíminn sé alltaf að lengjast á milli gosa.
„Það virðist erfiðara og erfiðara fyrir kvikuna að komast upp á yfirborðið og vonandi er það vísbending um að það fari að styttast eitthvað í annan endann á þessu. Við þurfum að búa okkur undir það að vera tilbúin um miðjan nóvember en það getur samt þýtt að við þurfum að bíða í tvo mánuði,“ segir Benedikt.
Hættumat Veðurstofunnar fyrir svæðið gildir til morgundagsins og segir Benedikt að nýtt hættumat verði gefið út á morgun.
„Það verður metið á fundi á morgun hvort það verði óbreytt eða hvort við förum að gíra okkur aðeins upp en það verða engar stórkostlegar breytingar á því.“
Þorvaldur Þórðarson eldfjallafræðiprófessor sagði í samtali við Morgunblaðið ekki alls fyrir löngu að líkurnar á því að dyngjugos verði á Sundhnúkagígaröðinni aukist með tímanum.
„Ég held að það sé afskaplega ólíklegt,“ segir Benedikt.
„Flestallar dyngjurnar mynduðust í kjölfar þess að ísaldarjökullinn hopaði og þegar hann var að þynnast komu stóru dyngjugosin. Við höfum ekki séð nein dyngjugos á Reykjanesinu árþúsundum saman og ég held að það séu engar vísbendingar um að það sé svo mikil kvika í boði að geta viðhaldið stóru dyngjugosi.“
Spara stórfé með olíukaupum ytra
Beint: Eldgos hafið við Stóra-Skógfell
Gosið gæti varað lengur: Meiri fyrirstaða í gosrásinni
Búseta skortir byggingarlóðir
Þórarinn: Tafir á höfuðborgarsvæðinu ekki minni
„Má segja að þetta gos hafi þjófstartað“
Á algjöru frumstigi eftir þrjár vikur af verkfalli
Hvað gerðist eiginlega í VMA?