Gæsluvarðhald yfir karlmanni á þrítugsaldri sem er grunaður um að hafa stungið karlmann á fertugsaldri í Grafarvogi í síðustu viku hefur verið framlengt um fjórar vikur í þágu almannahagsmuna.
Úrskurður þess efnis var kveðinn upp í Héraðsdómi Reykjavíkur í dag, að sögn Eiríks Valbergs, fulltrúa í miðlægri rannsóknardeild lögreglunnar á höfuðborgarsvæðinu.
Gæsluvarðhald yfir manninum átti að renna út í dag.
Annar karlmaður var handtekinn vegna árásarinnar en hann var látinn laus að loknum yfirheyrslum.
Fram kom í tilkynningu lögreglunnar í síðustu viku að karlmaðurinn sem varð fyrir árásinni hefði hlotið lífshættulega stunguáverka á líkama. Hann var fluttur á bráðamóttöku þar sem gert var að sárum hans. Hann hefur verið útskrifaður af sjúkrahúsi.