Félag íslenskra gullsmiða fagnaði í gær hundrað ára afmæli. Félagið var stofnað 19. október 1924 og er eitt elsta fagfélag landsins.
Í samtali við mbl.is segir Arna Arnarsdóttir, formaður Félags íslenskra gullsmiða, að félagið hafi fagnað afmælinu yfir allt árið en því hafi verið fagnað sérstaklega á stofndegi félagsins.
Í tilefni dagsins var sett niður gangstéttarhella með merki félagsins og stofndegi við Laugaveg 35 þar sem fyrsti fundur félagsins var haldinn. Auk þess opnaði félagið sýningu í Norræna húsinu þar sem verk danska gullsmiðsins Gitte Björn eru til sýnis og er sýningin opin almenningi til 1. nóvember.
Arna segir að vel hafi verið mætt á viðburðina og að félagsmenn hafi verið einstaklega ánægðir með daginn.