Með verk í sköflungnum í 30 klukkutíma

Fimm keppendur eru eftir af þeim 15 sem hófu keppni í heimsmeistaramóti landsliða í bakgarðshlaupum í Elliðaárdalnum í Reykjavík.

Þegar blaðamann bar að garði í hádeginu höfðu keppendurnir hlaupið í tvo sólarhringa og voru að ljúka við 48. hringinn. Nú rétt í þessu lögðu þau svo af stað í 51. hringinn.

Eftir eru þau Mari Järsk, Elísa Kristinsdóttir, Andri Guðmundsson, Þorleifur Þorleifsson og Marlena Radziszewska. Mari kom síðust í mark á hádegi, nokkrum mínútum á eftir hinum, og fékk því minni tíma en hinir til að hvíla sig, þar sem hver hringur hefst á heila tímanum.

Í heild keppa yfir 60 lönd í heimsmeistaramótinu og hleypur hvert þeirra í sínu eigin landi. Hófst keppnin á nákvæmlega sama tíma allsstaðar.

Hleypur þangað til hún dettur niður

„Ég er bara mjög góð og er í rauninni búin að vera það alveg frá því ég byrjaði að hlaupa,“ sagði Elísa, sem ræddi við blaðamann rétt áður en hún lagði af stað í 49. hringinn.

„Skrokkurinn er í lagi fyrir utan það að ég búin að vera með verk í sköflungnum í svona 30 klukkutíma,“ bætti hún við.

Aðspurð sagði hún að vel hefði gengið að hlaupa í nótt. „Það kom mér á óvart út af því að í maí gekk nóttin hræðilega hjá mér, þannig að þetta var mjög skemmtilegt að nóttin hafi gengið svona vel núna.“ Sagðist hún jafnframt eiga nóg inni í hlaupunum.

Hvað ætlarðu að hlaupa lengi?

„Þangað til ég dett niður, held ég,“ sagði hún og hló áður en hún rauk af stað í næsta hring.

Mikilvægt að borða, drekka og hvílast

Blaðamaður náði einnig tali af Hafdísi Guðrúnu Hilmarsdóttur, sem er í þjálfarateymi Elísu og hugsar um hana þegar hún hvílir sig á milli hringja.

Hafdís Guðrún sagði að met Elísu væri 56 hringir og taldi hún líklegt að hún myndi slá það í þessu bakgarðshlaupi. Metið var sett í maí síðastliðnum.

„Það skiptir rosalega miklu máli að ná að borða og drekka og hvílast. Hún er hraður hlaupari, þannig að hún hefur góðar pásur, eins og í nótt. Næturbrautin er fljótari yfirferðar en dagbrautin,“ bætti hún við um Lovísu, sem varð önnur í bakgarðshlaupi Náttúruhlaupa í maí.