Ekið var á tvo gangandi vegfarendur í Reykjavík í dag. Ökumaðurinn var handtekinn og vistaður í fangaklefa. Hann er grunaður um að hafa ekið undir áhrifum ávana- og fíkniefna sem og gegn rauðu ljósi.
Vegfarendurnir voru fluttir á slysadeild til aðhlynningar og er annar þeirra sagður meira slasaður en hinn.
Þetta kemur fram í dagbók lögreglunnar á höfuðborgarsvæðinu.
Þá var einnig ekið á gangandi vegfaranda í Múlahverfinu í Reykjavík. Var ökumaðurinn kærður fyrir að gera ekki viðeigandi ráðstafanir í kjölfar slyssins.
Vegfarandanum var ekið á slysadeild til frekari aðhlynningar vegna minni háttar meiðsla.
Þá var annar ökumaður kærður fyrir að aka bifreið í Hlíðunum þrátt fyrir að vera sviptur ökuréttindum.
Lögreglunni á Hverfisgötu var tilkynnt um yfirstaðin innbrot í tveimur fyrirtækjum í Laugardalnum. Eru þau mál í rannsókn.
Einnig þurfti lögreglan að vísa burt óvelkomnum aðila frá félagslegu þjónustuúrræði í Hlíðar-hverfinu.