Elva um Ragnar: „Þetta heitir að teygja anga sína“

Elva Hrönn Hjartardóttir stjórnmálafræðingur segir það áhugavert og siðlaust að Ragnar Þór Ingólfsson telji að framboð sitt fyrir Flokk fólksins muni ekki hafa áhrif á stöðu hans sem formaður VR.

Elva bauð sig fram til formanns VR í fyrra en laut í lægra haldi fyrir Ragnari.

Inga Sæland, formaður Flokks fólksins, staðfesti við mbl.is í dag að Ragnar myndi leiða framboðslista í öðru Reykjavíkurkjördæminu í næstu þingkosningum. Ragnar hyggst ekki láta af störfum hjá VR á meðan.

Elva Hrönn segir tíðindin ekki koma á óvart. Í færslu á Facebook sem hún ritaði í kvöld segir hún Ragnar hafa notið stuðnings frá flokknum þegar hún bauð sig fram gegn honum í formannskosningum VR á síðasta árið. 

„[O]g þingkona flokksins nýtti hvert tækifæri til að ata mig auri,“ ritar Elva á Facebook.

Frétt af mbl.is

Ragnar Þór áfram formaður VR

Segir hræsnina eiga sér engin takmörk

Elva veltir því fyrir sér hvort formaðurinn muni áfram þiggja laun á meðan framboðinu stendur.

„Þetta er sérstaklega áhugavert þar sem að honum fannst ég of pólitísk til að sinna störfum fyrir VR á sínum tíma og sérstaklega áhugavert í ljósi þess að það eina sem hann og kosningamaskínan hans fundu gegn mér var að ég væri of tengd stjórnmálunum, af því að ég var skráð í stjórnmálaflokk - en fannst ekki annað við hæfi en að segja mig úr stjórn flokksins þegar ég fór í formannsframboð,“ skrifar Elva og bætir við:

„Og nú fer maðurinn í framboð á launum sem formaður VR. Hræsnin á sér engin takmörk!“

Tekur hún þá einnig fram að Ragnar sé einnig formaður Landssambands íslenzkra verzlunarmanna og 1. varaforseti Alþýðusambands Íslands.

„Þetta heitir að teygja anga sína.“

• Blogga um frétt