Georg Eiður Arnarsson, varaþingmaður í Flokki fólksins, er hættur í flokknum. Segir hann samstarf við Ásthildi Lóu Þórsdóttur, þingmann flokksins, hafa gengið illa og sakar hana um að hafa unnið gegn því á sínum tíma að flokkurinn fengi tvo þingmenn en einungis 200 atkvæði vantaði upp á það.
Eins segir hann að Ásthildur hafi sagt að hún hefði ekki tíma fyrir kjördæmið þegar hún sat á þingi en hún er íbúi í Garðabæ. Þá að hún hafi neitað að kalla inn varaþingmann þegar hún var fjarverandi því hún hefði „ekki efni á því.“ Segir hann það þvert á loforð um að hún myndi kalla hann til þegar þörf væri á því. Sérstaklega þegar málefni sjávarútvegsins báru á góma í þinginu.
Þetta kemur fram í pistli í Eyjafréttum
„Eftir kosningarnar, þar sem Ásta Lóa (Ásthildur Lóa) var orðin þingmaður okkar sunnlendinga en er íbúi í Garðabæ, þá fór ég að senda reglulega á hana í skilaboðum alltaf þegar eitthvað var að gerast í kjördæminu, sem mér fannst að hún ætti að vita og þá hugsanlega koma á framfæri athugasemdum á þinginu, en eftir nokkra mánuði, þá hafði hún samband við mig og bannaði mér að senda svona efni á sig vegna þess, að hún hefði einfaldlega ekki tíma til að sinna einhverju öðru en því, sem hún var að sinna á Alþingi. Þetta pirraði mig alveg rosalega mikið, en já, ég leysti af í viku vorið 2022 og fékk mikið lof frá mínu fólki fyrir það sem ég talaði um þar. Í framhaldinu bjóst ég að sjálfsögðu við að frá frekari afleysingar veturinn þar á eftir, en aldrei kom símtalið,“ segir Georg.
Steininn hafi tekið úr þegar Ásthildur Lóa var í fríi frá þingstörfum erlendis en ekki var haft samband við Georg til að stíga inn á þing. Segir Georg vini hafa gert athugasemd við þetta og spurt hann hvers vegna hann væri ekki á þingi sem varaþingmaður.
Hann segir að Ásthildur hafi gefið honum loðin svör og að hún hafi óvænt farið í ferðalag og ekki gefist tími til að kalla inn varamann.
Þá hafi hún loks árið 2023, í lok júní, tilkynnt honum í einkasamtali um að loforð sem hún hafi gefið um afleysingar gæti hún ekki staðið vegna þess að hún hafði ekki efni á því. „Mér fannst þetta mjög sérstakt í ljósi þess að hún fór a.m.k. 3 ferðir erlendis þetta árið,“ segir Georg.
Þá og þegar íhugaði Georg að segja sig úr flokknum en eftir samtöl við stuðningsmenn hafi hann rætt meint áhugaleysi Ásthildar á kjördæminu við Ingu Sæland. Hún hafi þá rætt við Ásthildi sem hafi tekið á sig rögg um skamma stund að sögn Georgs. Allt fór hins vegar fljótlega í sama horf að sögn hans.
Nú fyrir kosningarnar sem fram undan eru bauð Ásthildur honum fjórða sæti á lista flokksins. Hann segir það hafa verið fyrirséð en hann var í öðru sæti fyrir síðustu kosningar.
„Fyrir mitt leyti hins vegar, þá mun ég að öllum líkindum ekki kjósa flokkinn í komandi kosningum, en óska mínum fyrri félögum alls hins besta í kosningunum og þakka um leið öllum þeim sem stutt hafa mig í þessari vegferð,“ segir Georg.
Segist hann jafnframt ekki útiloka að bjóða sig fram aftur ef hann getur komið málefnum sjávarútvegsins á dagskrá.