Yo-Yo Ma segist kolfallinn fyrir Íslandi
Setja bókamerki
„Ég er ástfanginn af Íslandi,“ er það fyrsta sem bandaríski sellóleikarinn Yo-Yo Ma segir við blaðamann Morgunblaðsins.
„Ég elska þetta land og fólkið sem ég hef hitt hefur sýnt mér hvernig gildum hefur verið haldið í heiðri hér í sögulega langan tíma, frá goðsagnakenndum tíma til nútímans. Mér finnst þetta land og fólkið sem hér býr búa yfir svo mikilli visku. Visku sem það getur deilt með heiminum. Hér eru allir svo hjálplegir og gjafmildir í garð hvers annars en við þurfum meira af slíku í heiminum, því það er svo mikils virði,“ segir hann, inntur eftir því hvernig tilfinning það hafi verið að spila Elgar með Sinfóníuhljómsveit Íslands fyrir fullum Eldborgarsal í Hörpu á fimmtudaginn.
Í kjölfar standandi lófataks áheyrenda lék hann svo íslenska þjóðlagið „Nú vil ég enn í nafni þínu“ ásamt sellóleikurum sveitarinnar en Þórður Magnússon útsetti lagið sérstaklega fyrir þennan viðburð.
Fullur eftirvæntingar fyrir kvöldinu
Í kvöld klukkan 20 verða haldnir í Eldborg dúó-tónleikar Ma með píanistanum Kathryn Stott.
Verkin á efnisskránni spanna allt frá nítjándu öldinni til þeirrar tuttugustu og fyrstu en á fimmtudaginn kom út hljómdiskur með dúóinu, sem ber heitið Merci, og verða sum verkanna á honum flutt á tónleikunum í kvöld.
„Ég er fullur eftirvæntingar fyrir tónleikunum með Kathy. Hún er líkt og ég að heimsækja Ísland í fyrsta sinn og er mjög spennt fyrir kvöldinu. Við höfum spilað saman í 40 ár og erum mjög góðir vinir,“ segir hann.
„Við höfum spilað og kannað alls kyns tónlist saman en þessi efnisskrá endurspeglar margt af því sem við höfum gengið í gegnum saman og hún er því svolítið persónuleg. Í lok árs mun Kathy stíga niður af sviðinu, eftir að hafa komið fram í næstum fimm áratugi, til að snúa sér að öðrum þáttum tónlistarinnar svo þetta verða með okkar síðustu tónleikum saman. Þeir hafa því mikla þýðingu fyrir okkur.“
Ítarlegt viðtal við Yo-Yo Ma mun birtast á menningarsíðum Morgunblaðsins á næstu dögum.
„Höfum ákveðið að hefja viðræður“
Halla hyggst tilkynna um umboð í dag
Fundurinn hófst með söng: „Við stöndum þétt saman“
Á þriðja hundrað strikuðu yfir eða færðu Þórð
Kristrún, Þorgerður og Inga funda kl. 15
Evrópumál voru ekki til umræðu
Kristrún komin með umboð
