Leggur til breytingar á öðru en gagnsæi

Ekki verður ráðist í breytingar sem lúta að auknu gagnsæi í nýju frumvarpi á lögum um endurgreiðslu vegna kostnaðar við rannsóknir og þróun. Hins vegar er lagt til samstarf Rannís og Skattsins og aukið eftirlit með endurgreiðslukerfinu.

Þetta segir Sigurður Ingi Jóhannsson, fjármála- og efnahagsráðherra í samtali við mbl.is.

Áður hafði Sigurður Ingi sagt að hann héldi ekki að fyrirkomulag endurgreiðsla væri eðlilegt í núverandi mynd. 

Frétt af mbl.is

Ekki upplýst hverjir fengu tugi milljarða

Kom vel til greina að breyta fyrirkomulaginu

mbl.is fjallaði fyrr á árinu um að eng­ar upp­lýs­ing­ar fengjust upp­gefn­ar um hverj­ir fengju meiri­hluta þeirr­ar end­ur­greiðslu sem ríkið veit­ir vegna rann­sókna og þró­un­ar ár hvert.

Á síðustu sex árum hafi­ aðeins verið upp­lýst um þá sem þáðu end­ur­greiðslu­styrki upp á 17,2 millj­arða af þeim 37,4 millj­örðum sem veitt­ir hafa verið.

„Mér finnst al­veg koma vel til greina að það þyrfti að setja sér­staka laga­heim­ild sem myndi heim­ila Skatt­in­um birt­ingu þess­ara upp­lýs­inga sem er ekk­ert óal­gengt þegar um styrki er að ræða,“ sagði Sigurður Ingi við mbl.is fyrr á þessu ári. 

Frumvarp til laga um breytingar á ýmsum lögum um skatta og gjöld sem birtist fyrr í mánuðinum bendir ekki til þess að gagnsæi verði aukið.

Frétt af mbl.is

Lagabreyting vegna styrkjakerfisins kemur til greina

Aukið samstarf og eftirlit

Sigurður Ingi sagði að gögnin væru engan veginn nægilega góð.

„Hluti af þessum tillögum er aukið samstarf milli Rannís og Skattsins, aukið eftirlit og ákveðnar breytingar sem munu skila okkur að við höfum betri stjórn á því sem er að gerast,“ segir Sigurður Ingi og bætir jafnframt við að hugtökin rannsókn og þróun verði skilgreind frekar.

Sigurður Ingi sagði í samtali við mbl.is fyrr á árinu að það kæmi vel til greina að setja sérstaka lagaheimild sem myndi heimila Skattinum að birta upplýsingarnar.

Jafnframt sagði Áslaug Arna Sigurbjörnsdóttir, háskóla-, iðnaðar- og nýsköpunarráðherra, að hún tæki undir ábendingar Skattsins um að tryggja aukið gagnsæi og betra eftirlit.

Sigurður Hannesson, framkvæmdastjóri Samtaka iðnaðarins, sagði í samtali við mbl.is fyrr á árinu að samtökin væru jákvæð gagnvart endurskoðun á kerfinu. Kerfið hafi skipt sköpum í því að byggja upp hugverkaiðnaðinn hérlendis.

Frétt af mbl.is

Vinna að breytingum á styrkjakerfinu

Frétt af mbl.is

Jákvæð fyrir auknu gagnsæi styrkjakerfisins

• Blogga um frétt