Kílómetragjaldið hefði áhrif til hækkunar á vísitölu neysluverðs

Ef olíugjald eða önnur vörugjöld af eldsneyti eru lækkuð eða felld niður hefur það áhrif til lækkunar á vísitölu neysluverðs. Hvað snertir áhrifin af upptöku kílómetragjalds er fáum fordæmum fyrir að fara í þeim efnum og svarið við því fyrir vikið ekki jafn augljóst, að því er segir á vef Hagstofunnar. 

Tekið er fram, að ekki séu þekkt nein slík dæmi í Evrópu en þar sé mikil reynsla af margs konar veggjöldum.

Litið yrði á kílómetragjaldið sem veggjöld

„Eftir skoðun á málinu frá ýmsum hliðum er niðurstaðan sú að þar sem gjaldið er háð notkun á vegum, þ.e. greitt er í réttu hlutfalli við fjölda ekinna kílómetra, yrði litið á kílómetragjaldið sem veggjöld og það tekið með í vísitölu neysluverðs. Kílómetragjaldið myndi því hafa áhrif á hana til hækkunar,“ segir í umfjöllun Hagstofunnar um gjaldið undir liðnum spurt og svarað. 

Þar er birt svar við spurningunni: Hefði það áhrif á vísitölu neysluverðs ef tekið yrði upp kílómetragjald á ökutæki í staðinn fyrir olíugjald?

Frétt af mbl.is

Verðbólga komin niður í 5,1%

Þá segir, að þessi niðurstaða sé ólík meðhöndlun á kílómetragjaldi á rafmagns-, vetnis- og tengiltvinnbíla sem tekið hafi verið upp um síðustu áramót. Þá hafi verið um að ræða gjald sem ekki var almennt fyrir alla sem nota vegina og því var litið á það sem skatt á ákveðna tegund bíla en ekki almennt gjald fyrir notkun á vegum.

Frétt af mbl.is

Frumvarp um kílómetragjald fyrir notkun allra ökutækja

Útvarpsgjaldið ólíkt kílómetragjaldinu

Hagstofan segir að bent hafi verið á fordæmi í afnámi afnotagjalds RÚV og upptöku útvarpsgjalds þess í stað. Útvarpsgjaldið sé þó ólíkt kílómetragjaldinu að því leyti að það sé innheimt óháð því hversu mikið eða hvort fólk nýti sér á annað borð þjónustu RÚV svo það er ekki sambærilegt við kílómetragjaldið.

Frétt af mbl.is

Greiða þarf gjald af 233.000 ökutækjum til viðbótar

Ekki hægt að svara því hver endanleg áhrif yrðu á vísitöluna

Annað dæmi sé frá árinu 2005 þegar þungaskatturinn hafi verið aflagður og í staðinn tekið upp olíugjald sem reiknaðist inn í verð dísilolíu. Þá hafi verið tekin ákvörðun um að hafa þungaskattinn inni í grunni vísitölunnar og fyrir vikið hafi niðurfelling hans haft áhrif til lækkunar á móti hækkuninni vegna olíugjaldsins.

„Hvað varðar endanleg heildaráhrif á vísitöluna er ekki hægt að svara því hver þau yrðu nema fyrir liggi endanleg útfærsla og vogir fyrir þann tímapunkt sem breytingarnar tækju gildi,“ segir á vef Hagstofunnar. 

• Blogga um frétt