Fjögurra manna fjölskylda slapp úr brennandi íbúð

Fjögurra manna fjölskylda var flutt á bráðamóttöku Landspítalans til skoðunar eftir að eldur kviknaði í íbúð í fjölbýlishúsi í efri byggðum Kópavogs í nótt.

Að sögn Lofts Þórs Einarssonar, varðstjóra hjá slökkviliðinu á höfuðborgarsvæðinu, barst útkallið klukkan 3.20 í nótt. Þegar slökkviliðið kom á staðinn hafði fjölskyldan, tvö börn og tveir fullorðnir, náð að koma sér sjálf út úr íbúðinni.

Sex íbúðir eru í fjölbýlishúsinu og var það rýmt á meðan slökkvistarf stóð yfir. Greiðlega gekk að slökkva eldinn og reykræsta. Fjölskyldan sem var í íbúðinni bar sig vel, að sögn Lofts Þórs.

Íbúðin er óíbúðarhæf eftir eldsvoðann. Öðrum íbúum fjölbýlishússins var hleypt inn í sínar íbúðir eftir að slökkvistarfi lauk um hálffimmleytið. 

Lögreglan hefur tekið við vettvanginum og sér hún um að rannsaka eldsupptök.

• Blogga um frétt