Málverk af Einari afhjúpað

Málverk af Einari K. Guðfinnssyni, fyrrverandi forseta Alþingis, var afhjúpað í Smiðju í dag.

Verkið er málað af Stephen Lárusi Stephen listmálara og verður því komið fyrir í efrideildarsal Alþingis.

Málverkið var afhjúpað að viðstöddum forseta Alþingis, Einari, fjölskyldu hans, vinum, þingmönnum og fyrrverandi og núverandi starfsfólki á skrifstofu Alþingis.

Lét af þingmennsku að eigin frumkvæði.

Einar K. Guðfinnsson var forseti Alþingis frá vorinu 2013 til haustsins 2016. Einar tók fyrst sæti sem varaþingmaður árið 1980 og 11 árum síðar, í þingkosningunum 1991, náði hann kjöri sem alþingismaður fyrir Sjálfstæðisflokkinn sem þriðji þingmaður Vestfjarða og tók sæti í neðri deild.

Eftir kjördæmabreytinguna 2003 var hann þingmaður Norðvesturkjördæmis. Einar Kristinn sat á 31 löggjafarþingi í 25 ár, allt til haustsins 2016 þegar hann lét af þingmennsku að eigin frumkvæði.

Einar gegndi embætti varaformanns þingflokks Sjálfstæðisflokksins á níu löggjafarþingum og var formaður þingflokks 2003–2005, þar til hann tók sæti í ríkisstjórn.

Hann var sjávarútvegsráðherra 2005–2007, tók þá samhliða við embætti landbúnaðarráðherra og varð svo fyrsti sjávarútvegs- og landbúnaðarráðherrann eftir sameiningu ráðuneytanna, árin 2008–2009.

• Blogga um frétt