Altjón eftir að kviknaði í út frá rafmagni

Altjón varð á raðhúsi við Kúrland í Fossvogi í fyrrinótt þegar mikill eldur kom upp. Tveir komust af sjálfsdáðum út úr húsnæðinu. Vettvangsrannsókn er lokið og samkvæmt bráðabirgðaniðurstöðu kviknaði í húsinu út frá rafmagni, nánar til tekið út frá straumbreyti sem stýrir ljósabúnaði.

„Bráðabirgðaniðurstaða segir að eldurinn hafi kviknað út frá rafmagni,“ segir Guðmundur Páll Jónsson, lögreglufulltrúi hjá lögreglunni á höfuðborgarsvæðinu.

Samkvæmt upplýsingum frá slökkviliðinu á höfuðborgarsvæðinu barst útkallið um klukkan þrjú aðfararnótt sunnudags. Allt tiltækt slökkvilið var sent á staðinn. Mikill eldur og reykur barst frá húsinu.

Reykkafarar fundu heimilisdýr sem hafði ekki komist út og endurlífgunartilraunir báru ekki árangur. Íbúar húsnæðisins voru fluttir á slysadeild.

„Það er altjón á húsnæðinu,“ segir Guðmundur.

• Blogga um frétt