56 lyfjatengd andlát á síðasta ári

Í fyrra voru lyfjatengd andlát alls 56 hér á landi, þar af voru 15 sjálfsvíg (vísvitandi sjálfseitranir). Þetta segja tölur um lyfjatengd andlát 2023 sem hafa verið birtar á vef embættis landlæknis.

Fram kemur að miðað við stærstu flokka dánarorsaka séu lyfjatengd andlát fá hér á landi og mikilvægt sé að túlka tölur einstakra ára af varúð enda geti verið um tilviljanakennda sveiflu að ræða.

Þegar horft er til meðaltals undanfarinna ára á hverja 100 þúsund íbúa sést að það fer úr 9,0 árin 2014-2018 í 11,3 árin 2019-2023.

Frétt af mbl.is

Andlátum vegna óhappaeitrana fjölgað mikið

Fleiri andlát hjá körlum 

Þegar tölur síðasta árs eru skoðaðir eftir kyni sést að lyfjatengd andlát voru fleiri hjá körlum (35) en konum (21). Lyfjatengd andlát voru flest í aldursflokkunum 18-29 ára (15) og 30-44 (23). Af 56 lyfjatengdum andlátum árið 2023 voru 34 vegna ópíóíða-eitrana og 22 vegna eitrana af öðrum ávana- og fíkniefnum og lyfjum.

Tölur um dánarorsakir byggja á dánarvottorðum einstaklinga sem áttu lögheimili á Íslandi við andlát. Dánarmein eru skráð af dánarvottorðum í dánarmeinaskrá embættis landlæknis og kóðuð samkvæmt nýjustu útgáfu og uppfærslum alþjóðlegrar tölfræðiflokkunar sjúkdóma og skyldra heilbrigðisvandamála.

Með lyfjatengdum andlátum er átt við andlát vegna eitrana ávana- og fíkniefna sem og lyfja. Þjóðir heims hafa ekki sammælst um eina alþjóðlega tölfræðilega skilgreiningu á lyfjatengdum andlátum.

• Blogga um frétt