Komi til verkfalla lækna verður engin læknisþjónusta á heilsugæslustöðvum landsins þann tíma sem verkföll standa yfir. Ekki verður hægt að hægt að fá lyf endurnýjuð eða koma í eftirlit af neinu tagi. Einn læknir verður þó á hverri stöð og má hann sinna mjög aðkallandi verkefnum.

Þetta segir Sigríður Dóra Magnúsdóttir, forstjóri Heilsugæslu höfuðborgarsvæðisins, í samtali við mbl.is. 

Félagar í Læknafélagi Íslands samþykktu í gær að hefja verkfallsaðgerðir þann 25. nóvember náist samningar ekki fyrir þann tíma. Verkföllin ná til þeirra lækna sem starfa hjá hinu opinbera; á Landspítalanum og heilbrigðisstofnunum um allt land, sem og á öllum heilsugæslustöðvum, fyrir utan þær einkareknu.

„Þetta mun hafa mikil áhrif og þetta er mikið áhyggjuefni. Við vonum svo innilega að þetta leysist og að ekki komi til verkfalla,“ segir Sigríður.

Frétt af mbl.is

Aftur samþykkja læknar verkfall

Mæðra- og ungbarnavernd verður sinnt

Verkföll lækna koma til með að hafa víðtæk áhrif á nánast alla starfsemi heilsugæslunnar.

„Það þýðir að það verður engin læknisþjónusta á heilsugæslustöðvum þessa daga sem verkfall er. Við getum haldið úti þjónustu þar sem engin aðkoma lækna, eins og ungbarnavernd, mæðravernd og fleira en allt það sem læknar blandast inn í, þar verður engin þjónusta og fólk getur ekki endurnýjað lyf, sent inn lyf eða komið í neitt eftirlit.“

Sigríður tekur þó fram að öryggisþjónusta verði til staðar á öllum heilsugæslustöðvum svo hægt verði að sinna mjög aðkallandi málum. Önnur læknisþjónusta verði ekki í boði, ekki einu sinni bráðaþjónusta.

„Það verður engin, hvorki bráðaþjónusta né hefðbundnir tímar. Eina sem verður, það verður öryggisþjónusta á hverri stöð ef eitthvað mjög aðkallandi er. Það verður læknir við á hverri stöð, en hann má ekki ganga í störf. Hann bara sinnir því sem er mjög brátt.“

Frétt af mbl.is

Útspil ríksins hafi hleypt illu blóði í félagsmenn

Mikið áhyggjuefni að öllu leyti

Aðspurð hvort það geti skapast neyðarástand við slíkar aðstæður segir Sigríður verkföllin aðallega koma til með að hafa þau áhrif að enn lengri bið verði eftir tímum hjá læknum og úrræðum.

„Þetta mun búa til enn þá stærri kúf af verkefnum sem við erum ekki búin að leysa og komumst ekki yfir að leysa. Þannig það mun taka tíma að vinda ofan af öllu því. Þetta er því að öllu leyti mikið áhyggjuefni.“

Hún segist mátulega bjartsýn á að samningar náist áður en verkföll skella á.

„Ég veit að það er verið að skoða þetta frá mörgum sjónarhornum en það er mjög mikilvægt að það verði líka hugað að áherslum heimilislækna og heilsugæslunnar í þessum kjarasamningum. Að það endurspeglist í þessum samningum.“

Frétt af mbl.is

„Það er engin ákveðin hreyfing í deilunni“

Allir vinnustaðir lækna í verkfalli á sama tíma

Líkt og áður sagði hefjast verkfallsaðgerðir þann 25. nóvember.

Fyrstu vik­una verða all­ir vinnustaðir lækna í verk­falli frá mánu­degi 25. nóv­em­ber til fimmtu­dags 28. nóv­em­ber, frá miðnætti til kl. 12 að há­degi. Næstu vik­una verða all­ir vinnustaðir lækna í verk­falli frá miðnætti til kl. 12 á há­degi þriðju­dag­inn 3. des­em­ber og fimmtu­dag­inn 5. des­em­ber. Í þriðju vik­unni verða all­ir vinnustaðir lækna aft­ur í verk­falli frá mánu­degi 9. des­em­ber til fimmtu­dags 12. des­em­ber frá miðnætti til kl. 12 á há­degi. Í fjórðu vik­unni verða all­ir vinnustaðir lækna í verk­falli mánu­dag 16. des­em­ber og miðviku­dag 18. des­em­ber frá miðnætti til kl. 12 á há­degi,“ að fram kemur í til­kynn­ingu á vef Lækna­fé­lags Íslands.

Hlé verður svo á verk­fallsaðgerðum frá 20. des­em­ber til og með 5. janú­ar 2025 en þær munu halda áfram með ná­kvæm­lega sama hætti, þ.e. í fjög­urra vikna lot­um al­veg fram að dymb­il­viku.

Tengdar fréttir

Kjaraviðræður

Kjör kennara hafi vaxið langt umfram almennan markað

• Aftur samþykkja læknar verkfall
• Kröfugerðin skýr en upphæðin ekki
• „Það var ekki dæmt löglegt að mismuna börnum“
• Fullt út úr dyrum á baráttufundi kennara

» Fleiri tengdar fréttir

• Blogga um frétt