Skúli og stjórnendur WOW sýknaðir en 780 milljóna greiðslum rift
Setja bókamerki
Skúli Mogensen, stofnandi og fyrrverandi forstjóri WOW air, og stjórnarmenn í WOW air hafa verið sýknuð af kröfum þrotabús WOW til greiðslu skaðabóta sem samsvara fjárhæð riftunarkrafna upp á hátt í tvo milljarða króna.
Hins vegar var greiðslum frá WOW til íslenska ríkisins, nokkurra erlendra fyrirtækja, flugvallarins í Toronto og Títans fjárfestingafélags, félags í eigu Skúla, upp á samtals sem nemur um 780 milljónum rift. Til viðbótar við það bætast dráttavextir yfir fimm ára tímabil.
Í tveimur riftunarmálunum var kröfu þrotabúsins vísað frá eða málinu vísað frá dómi. Átti það meðal annars um riftunarmál gegn breskum skattayfirvöldum.
Ellefu mál og mörg þúsund blaðsíðna málsgögn
Í stuttu máli er um að ræða ellefu riftunar- og skaðabótamál sem þrotabúið höfðaði gegn stjórnendum WOW air og tryggingafélögum. Málið var umfangsmikið og flókið og málsgögn þess þúsundir blaðsíðna.
Farið var fram á riftun greiðslna til kröfuhafa, og að forstjóri og/eða stjórnendur yrðu dæmdir til greiðslu skaðabóta sem samsvara fjárhæð riftunarinnar, þ.e.a.s. hátt í tveir milljarðar. Skiptastjórar þrotabúsins töldu greiðslur hafa verið gerðar á vafasömum tíma í sögu félagsins og að kröfuhöfum hefði verið mismunað.
Stjórnarmönnunum sem var stefnt ásamt Skúla í málinu voru Liv Bergþórsdóttir, fyrrverandi stjórnarformaður og núverandi forstjóri Bioeffect, Helga Hlín Hákonardóttir og Davíð Másson. Voru þau öll í stjórn félagsins þegar WOW varð gjaldþrota. Þá var einnig tryggingafélögunum Eurocontrol, DUAL Corporate Risks Limited, Liberty Mutual Insurance Europe Limited, Everest Syndicate 2786 at Lloyd’s og Everest Syndicate, Hardy Syndicate 382 at Lloyd’s og QBE UK Limited stefnt í málinu.
Horfa verður til aðstæðna og mikilvægis félagsins
Í dómunum er vísað til þess að bótaábyrgð verði aðeins felld á stjórn sé komist að þeirri niðurstöðu að tjóni hafi verið valdið af ásetningi eða stórkostlegu gáleysi.
Segir í dóminum að miðað við aðstæður og málsatvik í aðdraganda gjaldþrotsins verði að veita stjórninni nokkurt svigrúm í tilraunum sínum til að bjarga rekstri félagsins. Þá verði ekki horft fram hjá því að rekstur félagsins hafi verið metinn þjóðhagslega mikilvægur samkvæmt gögnum málsins.
Hæsta upphæðin frá ríkinu
Hæsta upphæðin sem rift var eru greiðslur til íslenska ríkisins, samtals upp á 273 milljónir auk vaxta. Er í þeim dómi vísað til þess að þegar WOW leitaði að hugsanlegum samningum við fjárfesta (m.a. Indigo partners) rétt fyrir gjaldþrotið hafi forsenda fyrir slíkum samningum og þannig áframhaldandi rekstri WOW verið að félagið væri áfram í rekstri.
Til að svo mætti verða var stjórn nauðsynlegt að grípa til aðgerða í rekstrinum og liður í því var að forgangsraða greiðslum með hlutrænum hætti þannig að bráðnauðsynlegar greiðslur, með tilliti til áframhaldandi reksturs nytu forgangs. Það leiddi til þess að greiðslur til íslenska ríkisins, og annarra félaga sem tekist er á í málunum öllum, voru framkvæmdar. Að öðrum kosti hefði rekstur félagsins stöðvast.
Forgangsröðun greiðslna réttlætanleg
Því telur dómurinn að ekki hafi verið sýnt fram á að sá tími sem stjórn hafði til að snúa rekstri félagsins við teldist hafa runnið sitt skeið á enda áður en greiðslurnar voru inntar af hendi og óskað var gjaldþrotaskiptum, þannig að skaðabótaábyrgð varði.
Telur dómurinn að vegna þessa, þó að aðrar greiðslur hafi á sama tíma verið í vanskilum, verði ekki fallist á að í slíkri forgangsröðun greiðslna felist saknæm eða ólögmæt háttsemi af hálfu stjórnenda.
Greiðslunum engu að síður rift
Hins vegar er í dóminum vísað til þess að íslenska ríkið og aðrir þeir sem greiðslur fengu á þessum tíma hafi haft hag af hinum riftanlegu ráðstöfunum í skilningi laga og beri því að rifta greiðslunum.
Félögin sem fengu greiðslur frá WOW og hefur nú verið rift með dómi héraðsdóms eru:
- Jin Shan 20 Ireland company – 601.614 USD, eða sem nemur 128,5 milljónum króna.
- Íslenska ríkið – 272.653.082 krónur.
- RRPF Engine Leasing Ltd – 310.441 USD, eða sem nemur 44,3 milljónum króna
- Saint Lawrence Aviation Leasing Ltd – 384.424 USD, eða sem nemur 54,8 milljónum.
- Air Lease Corporation – 600.000 USD og 300.000 EUR, samtals sem nemur 131,8 milljónum króna.
- Greater Toronto Airports Authority – 394.716 CAD, eða sem nemur um 40,6 milljónum króna.
- Eurocontrol – 1.458 EUR, eða sem nemur um 225 þúsund króna.
- Títan fjárfestingafélag – 107.640.000 krónum.
Til viðbótar við að greiðslunum sé rift og félögin þurfa að greiða upphaflega upphæð þurfa þau að greiða vexti yfir rúmlega 5 ára tímabil.
Títan fjárfestingafélag er félag í eigu Skúla.
Fréttin hefur verið uppfærð.
Óttast að fólk fari aftur að eyða peningum
Þórarinn: Tafir á höfuðborgarsvæðinu ekki minni
Átti ekki að láta pirring bitna á sjúklingi
Spara stórfé með olíukaupum ytra
Gosið gæti varað lengur: Meiri fyrirstaða í gosrásinni
Mjög alvarlegt ef Njarðvíkuræð gefur sig
Einar skorar á næstu ríkisstjórn