Innlent | Morgunblaðið | 14.11.2024 | 10:15

Hallinn stefnir í 75 milljarða í ár

Önnur umræða um frumvarp til fjáraukalaga hófst á Alþingi í gær. Síðdegis fundaði fjárlaganefnd svo um fjárlagafrumvarpið. Morgunblaðið/Eyþór

Í endurmati á afkomuhorfum ríkissjóðs eftir að frumvarp til fjáraukalaga ársins var lagt fram í seinasta mánuði er nú gert ráð fyrir að halli á rekstri ríkisins verði rúmlega 75 milljarðar kr. á yfirstandandi ári eða 1,7% af vergri landsframleiðslu í stað 68 milljarða halla sem spáð var þegar frumvarpið kom fram.

Þessi lækkun á afkomuhorfum ríkissjóðs frá fyrra mati nemur sjö til átta milljörðum og er hún rakin til lægri tekna en áður var áætlað. Verði þetta niðurstaðan verður afkoma ríkissjóðs á þessu ári rúmlega 24 milljörðum kr. lakari en gengið var út frá í fjárlögum yfirstandandi árs.

Lagt er til 100 milljóna króna framlag til Kvikmyndasjóðs

Meirihluti fjárlaganefndar gerir nokkrar tillögur um viðbótarútgjöld fyrir aðra umræðu um fjáraukalagafrumvarpið. Þar á meðal er tillaga um 800 milljóna kr. hækkun framlaga til að fjármagna skattfrjálsa eingreiðslu til örorku- og endurhæfingarlífeyrisþega til samræmis við eingreiðslur í desember síðastliðin ár. Lagt er til 100 milljóna króna framlag til Kvikmyndasjóðs sem er ætlað að gera sjóðnum kleift að taka þátt í verkefnum sem annars væri ekki unnt að ráðast í á árinu og gerð er tillaga um 110 milljóna króna framlag til Landhelgisgæslunnar.

Eins og greint var frá í Morgunblaðinu 24. október lagði fjármálaráðherra fjáraukalagafrumvarpið fram með tillögum um ýmsar breytingar á fjárlögum ársins sem fólu í sér að útgjöld ríkissjóðs á yfirstandandi ári aukast um 24,5 milljarða kr. Framlög af ýmsum toga hækki um 9,9 milljarða en þyngst vega aukin vaxtagjöld ríkissjóðs sem hækka um 14,6 milljarða eftir endurmat.

Lesa má nánar um málið í Morgunblaðinu í dag