Tónlistarmaðurinn Bubbi Morthens, í samstarfi við menningar- og viðskiptaráðuneytið, hefur að undanförnu unnið að íslenskuverkefni undir yfirskriftinni Málæði. Afrakstur verkefnisins verður frumsýndur á RÚV í kvöld, á degi íslenskrar tungu.

Verkefninu er ætlað að hvetja ungt fólk til að tjá sig á íslensku í tali og tónum.

Í tilkynningu á vef Stjórnarráðsins segir að skilaboð verkefnisins séu þau að tungumálið tilheyri öllum og að leika megi sér með það.

Norðurland kom sterkt inn

Í tilkynningu er haft eftir Elfu Lilju Gísladóttur, verkefnastjóra List fyrir alla, að þátttaka í verkefninu hefur verið stórgóð:

„Við fengum senda yfir 100 texta og fjölda laga alls staðar að en Norðurland kom sérstaklega sterkt inn þar sem lögin þrjú koma frá unglingum í Grunnskólanum Austan vatna á Hofsósi, Grunnskóla Húnaþings Vestra og Brekkuskóla á Akureyri.“

Fjöldi tónlistarmanna tók þátt

Fjöldi tónlistarmanna tók þátt í verkefninu. Tónlistarkonan GDRN og Vignir Snær heimsóttu Hofsós og unnu með unglingadeild skólans þar. Þá heimsótti rapparinn Emmsjé Gauti Brekkuskóla á Akureyri og vann þar með 10. bekk skólans.

Kynnar þáttarins á RÚV eru Katla Njálsdóttir og Mikael Kaaber og hefst hann klukkan 19:45.

„Ég fæ hreinlega gæsahúð við að rifja upp síðustu tvær vikur þar sem við höfum þeyst um landið með þekktu og reyndu tónlistarfólki og séð upprennandi tónlistarfólk skína skært. Tungumálið tilheyrir okkur öllum og það má, og á að leika sér með það. Barnamenning er ekki bara afþreying heldur erum við að ala upp manneskjur og rækta mennsku. Gefa ungu fólki tæki og tól til að finna sínu áhugasviði og hæfileikum farveg með íslenskuna að vopni,“ er haft eftir Elfu Lilju í tilkynningunni.

Tengdar fréttir

Íslenska

Innleiða íslenskunám fyrir erlent starfsfólk

• Móttökuskólar „betri leið til inngildingar“
• Glænýr íslenskuvefur á að einfalda málið
• Kristján Hreinsson kærir RÚV til ráðherra
• Mun ekki tala um „Norðfólk“ í stað „Norðmanna“

» Fleiri tengdar fréttir

• Blogga um frétt