Lögregla handtók mann sem reyndist eftirlýstur

Lögreglan á höfuðborgarsvæðinu handtók mann í hverfi 105 sem var að brjótast inn í bifreiðar. Maðurinn var einnig með fíkniefni meðferðis og svo kom á daginn að hann var sömuleiðis eftirlýstur. Var hann vistaður í fangaklefa. 

Þetta kem­ur fram í dag­bók lög­reglu þar sem greint er frá verk­efn­um lög­reglu frá klukk­an 17 í gær til 05 í morg­un.

Þá var lögreglu tilkynnt um umferðarslys þar sem ökumaður hafði misst stjórn á bifreið sinni í hverfi 104. Hann ók á kyrrstæða bifreið og var fluttur á slysadeild með sjúkrabifreið.

Í miðbænum var ekið á gangandi vegfaranda. Hann hlaut minniháttar meiðsli.

Grunaður um ólöglega dvöl

Í Árbænum var maður handtekinn vegna líkamsárásar og eignaspjalla. Hann var vistaður í fangaklefa.

Þá var annar maður handtekinn í Árbænum, en hann er grunaður um sölu og dreifingu fíkniefna. Gat maðurinn ekki framvísað skilríkjum og er hann grunaður um ólöglega dvöl hér á landi. Maðurinn var vistaður í fangaklefa.

Í Hafnarfirði var ökumaður handtekinn þar sem hann var undir áhrifum fíkniefna. Hann var einnig sviptur ökuréttindum og framvísaði fölsuðu ökuskírteini.

• Blogga um frétt