Fuglainflúensa í mávi við Reykjavíkurtjörn

Mávur sem fannst í byrjun nóvember við Reykjavíkurtjörn greindist með skæða fuglainflúensu H5N5.

Þetta kemur fram í tilkynningu inni á vef Matvælastofnunar. 

„Almenningur er beðinn um að tilkynna tafarlaust um fund á veikum eða dauðum villtum fuglum til Matvælastofnunar. Varast ber að snerta hræ og handfjatla veika villta fugla. Allir sem halda alifugla eða aðra fugla eru hvattir til að viðhafa ýtrustu smitvarnir við umhirðu fuglanna,“ segir í tilkynningunni. 

Fyrsta greining sjúkdómsins á þessu ári

Þá kemur fram, að þann 1. nóvember hafi veikur mávur fundist við Reykjavíkurtjörn. Hann var ófær um að forða sér og var því aflífaður af starfsfólki Reykjavíkurborgar og færður til Dýraþjónustu Reykjavíkur til sýnatöku.

Tilraunastöð HÍ í meinafræði að Keldum staðfesti 14. nóvember að skæð fuglainflúensa H5N5 hafi greinst í sýni úr fuglinum. Þetta er fyrsta greining sjúkdómsins í villtum fugli á höfuðborgarsvæðinu á þessu ári.

„Mikilvægt er að allir sem finna veikan eða dauðan villtan fugl tilkynni hann til Matvælastofnunar í gegnum ábendingarkerfi hennar eða til Dýraþjónustu Reykjavíkur, finnist fuglinn í Reykjavík. Æskilegt er að tilkynningunni fylgi mynd af fuglinum ásamt staðsetningu, gjarnan í formi hnita fundarstaðarins,“ segir í tilkynningunni. 

Fáar tilkynningar borist

Þá segir, að fáar tilkynningar hafi borist í haust um fund á veikum eða dauðum villtum fuglum og megi því álykta að sjúkdómurinn sé ekki að valda miklum afföllum um þessar mundir. En hafa þurfi í huga að sumar þeirra fuglategunda sem smitið hafi greinst í séu staðfuglar og af þeim geti því áfram stafað smithætta fyrir alifugla og aðra fugla í haldi.

Matvælastofnun og áhættumatshópur um fuglainflúensu meti miðlungs líkur á því að alvarlegt afbrigði fuglainflúensuveira berist í alifugla og aðra fugla í haldi og sé óvissustig, sem virkjað var í síðasta mánuði, því enn í gildi.

Ekki snerta hræin

„Smithætta af skæðum fuglainflúensuveirum sem nú finnast í Evrópu, þar með talið á Íslandi, er metin lítil fyrir almenning en getur verið miðlungs fyrir einstaklinga sem eru í mikilli nálægð eða snertingu við fugla.

Þrátt fyrir litla smithættu er almenningi ráðlagt að snerta ekki hræ og koma ekki nálægt eða handleika veikan villtan fugl, nema að viðhöfðum góðum sóttvörnum svo sem að nota einnota hanska og veiruhelda grímu. Ef fugl er augljóslega slasaður skal tilkynna um hann til viðkomandi sveitarfélags sem er skylt að bregðast við samkvæmt lögum um velferð dýra. Sveitarfélög eru ábyrg fyrir því að koma villtum dýrum í neyð til aðstoðar eða sjá til þess að þau séu aflífuð á mannúðlegan hátt,“ segir í tilkynningu MAST. 

• Blogga um frétt