Innlent | mbl | 21.11.2024 | 11:15 | Uppfært 12:30

„Erum í miðri hrinu“: Styttist í Eldvörp

Ármann býst ekki við því að eldgosið standi lengi yfir. Samsett mynd/mbl.is/Eggert Jóhannesson

Ármann Höskuldsson eldfjallafræðingur segir eldgosið sem hófst í Sundhnúkagígaröðinni í gærkvöldi vera nokkuð hefðbundið en þó í minni kantinum, enda hafi land risið minna en áður.

Beint: Eldgos hafið við Stóra-Skógfell

Hann segir gossprunguna vera á hefðbundnum stað og megin uppkomuna virðast vera á milli Stóra-Skógfells og Sýlingarfells.

Gosið gæti varað lengur: Meiri fyrirstaða í gosrásinni

„Svo breytist landið með hverju gosinu. Nú vill svo til að það fer svolítið mikið til vesturs þannig að það var nokkuð ljóst að í upphafi að Grindavíkurvegur færi undir og svo er þetta spurning með Njarðvíkuræðina,“ segir Ármann, spurður út í eldgosið.

Frétt af mbl.is

Myndir: Grindavíkurvegur aftur undir hraun

Frétt af mbl.is

Hraunið náð Njarðvíkuræð: Fylgjast með raflínu

„Það var eitthvað að gerast“

Kom þessi stutti fyrirvari eldgossins þér á óvart?

„Í sjálfu sér ekki. Það var eitthvað að gerast því að þessar kúrfur…þessir GPS-mælar voru orðnir flatir þannig að það var eitthvað í gangi. Við erum í miðri hrinu og þá er ekki alltaf sem þetta hagar sér eins og maður hefði viljað,“ svarar hann.

Horft yfir gosið og hrauntauminn sem rennur til vesturs frá því. mbl.is/Eggert Jóhannesson

Ármann nefnir að eldgosið hafi verið fljótt að ganga niður í nótt og býst ekki við að það verði sérlega langvinnt. Miðað hvernig þróunin hefur verið núna ætti það varla að standa yfir í margar vikur.

Sjö eldgos á tæpu ári koma ekki á óvart

Eldgosið sem hófst í gærkvöldi er það sjötta á þessu ári í Sundhnúkagígaröðinni og það sjöunda síðan í desember í fyrra. Spurður hvort hann hefði trúað því fyrir fram að svona mörg gos yrðu á svona skömmum tíma, svarar hann því játandi.

Frétt af mbl.is

Sjöunda gosið á Sundhnúkagígaröðinni

Hann segir gliðnunarhrinu vera í gangi og bendir í því samhengi á Kröfluelda og sams konar hrinu sem gekk yfir Öskjukerfið árið 1875 þegar tíu eldgos urðu á innan við ári. Þessi mörgu eldgos í Sundhnúkagígaröðinni komi því ekki á óvart því jarðskorpan sé að rifna í sundur og aðstæðurnar hagstæðar fyrir kvikuna til að leita upp á yfirborðið.

Flæði hraunsins hefur verið nokkuð hratt, en tungan er þó minni um sig en í fyrri gosum. mbl.is/Eggert Jóhannesson

Færir sig inn í Eldvörp

Heldurðu að það verði álíka mörg eldgos þarna á næsta ári?

„Ég trúi því að þessu fari að ljúka þarna og þetta fari að færa sig inn í Eldvörp. Ég er að bíða eftir því að það farið að rifna þeim megin frá,“ svarar Ármann, sem útilokar þó ekki að fleiri eldgos gætu orðið í Sundhnúkagígaröðinni.