Innlent | mbl | 21.11.2024 | 23:52

Lyftari yfir fót og rjúfa þurfti hurð

Lögregluþjónar af lögreglustöð 1 sinntu verkefnum sínum í dag sem aðra daga og fóru meðal annars í mál þar sem lyftara hafði verið ekið yfir fót manns auk þess sem börn höfðu læst sig inni á salerni og þurfti lögregla að rjúfa hurð til að veita þeim frelsi. mbl.is/Eggert Jóhannesson

Lögreglan á höfuðborgarsvæðinu – fulltrúar lögreglustöðvar 1 sem annast miðborgina, Vesturbæ, Austurbæ og Seltjarnarnes – hélt á vettvang vinnuslyss í Vogunum í dag þar sem lyftara hafði verið ekið yfir fót vinnandi manns og var hann fluttur undir læknishendur með fulltingi sjúkraflutningafólks.

Er þetta meðal þess helsta sem lögregla skráði í dagbók sína tímabilið frá klukkan 05 á fimmtudagsmorgun og þar til jafnlengdar síðdegis, klukkan 17.

Um það leyti er lögregla sendi fjölmiðlum króníku sína gistu tveir fangageymslur hennar en 45 mál voru bókuð í kerfum lögreglu framangreindar tólf klukkustundir. Almennt lögreglueftirlit og aðstoðarbeiðnir ýmsar eru ekki inni í þeirri tölu.

Rjúfa þurfti hurð

Vinnuslysið var ekki eina lögreglumálið í Vogunum þennan fimmtudaginn. Tilkynnandi nokkur hafði samband og sagði af ungum börnum sínum sem læst höfðu sig inni á baðherbergi og voru allar bjargir bannaðar. Þurftu aðvífandi lögreguþjónar að rjúfa hurð baðherbergisins til að veita ungviðinu frelsi sitt á ný. Reyndust þau ekki hafa beðið hnekki af.

Þá sektuðu lögregluþjónar af lögreglustöð 1 ökumann fyrir akstur gegn rauðu ljósi og annar hlaut sömu örlög fyrir réttindalausan akstur gegn rauðu ljósi.