Brátt verður Brettingur á meðal vor

Mannanafnanefnd hefur samþykkt eiginnafnið Brettingur en nafninu var þó hafnað sem millinafni.

Segir í úrskurði nefndarinnar að til þess að heimilt sé að samþykkja nýtt millinafn þurfi öll skilyrði 6. gr. laga um mannanöfn að vera uppfyllt.

Í málinu reyndi á 1. lið skilyrðanna en þar segir að millinöfn megi ekki hafa nefnifallsendingu, sem Brettingur geri með -ur, og fullnægi þess vegna ekki skilyrðunum.

Eiginnafns krafist til vara

Hins vegar var til vara krafist að Brettingur yrði samþykkt sem eiginnafn og þurfti þá að uppfylla öll skilyrði 5. gr. laga um mannanöfn.

Segir í úrskurðinum að Brettingur muni taka íslenskri beygingu í eignarfalli, Brettings, og uppfyllti að öðru leyti öll ákvæði 5. greinarinnar.

Var því nafninu Brettingur hafnað sem millinafni en það samþykkt sem eiginnafn og verður það fært á mannanafnaskrá.

Gandri Úlfberg gæti sést von bráðar

Þá hefur mannanafnanefnd einnig samþykkt millinafnið Úlfberg og eiginnafnið Gandri.

Sjá má úrskurði nefndarinnar hér.

• Blogga um frétt