Innlent | mbl | 25.11.2024 | 18:15

Falskur fyrirvari á auglýsingum Höllu

Alls eru 18 auglýsingar þar sem segir að sjóður sem ber heitið Stuðningsfólk Höllu Hrundar Logadóttur hafi greitt fyrir. Framsókn í Suðurkjördæmi var hins vegar að greiða fyrir auglýsingarnar. Samsett mynd/mbl.is/Eggert/Ágúst/AFP

Halla Hrund Logadóttir, oddviti Framsóknar í Suðurkjördæmi, er með kostaðar auglýsingar á samfélagsmiðlum META og þar kemur fram rangur fyrirvari um það hver sé raunverulega að fjármagna auglýsingarnar.

Kosningastjóri Framsóknar í Suðurkjördæmi segir að um mannleg mistök sé að ræða sem búið er að leiðrétta.

Samkvæmt gagnasafni facebook þá hafa 18 auglýsingar birst í þessum mánuði þar sem segir að kosningasjóður Höllu í forsetakosningunum hafi greitt fyrir auglýsingarnar, Stuðningsfólk Höllu Hrundar Logadóttur.

Það er hins vegar Framsókn í Suðurkjördæmi sem er að fjármagna auglýsingar, segir Jóhann Sigurðsson, kosningastjóri Framsóknar í Suðurkjördæmi, aðspurður í samtali við mbl.is.

Hér má sjá dæmi um nokkrar virkar auglýsingar sem Halla er með í loftinu. Eins og sjá má í auglýsingunum þá segir að lögaðilinn Stuðningsfólk Höllu Hrundar Logadóttur sé að greiða fyrir auglýsingarnar. Það er ekki rétt. Skjáskot/Facebook Ads Library

Þarf að lýsa réttum aðila

„Þetta var bara smá mistök hjá samfélagsmiðlastjóranum að vera ekki búinn að breyta þessu en Framsókn í Suðurkjördæmi er að greiða þessar auglýsingar,“ segir Jóhann og bætir við að búið sé að laga þetta.

Í reglum META, sem á Facebook og Instagram, segir að fyrirvari fyrir pólitískar auglýsingar þurfi að „lýsa nákvæmlega nafni þess aðila eða einstaklings sem ber ábyrgð á auglýsingunni.“ Það er ekki búið að vera tilfellið hjá Höllu undanfarnar vikur.

Í lögum um starfsemi stjórnmálasamtaka segir að auglýsingar og annað kostað efni, sem ætlað er að hafa áhrif á úrslit kosninga, skuli „vera merkt auglýsanda eða ábyrgðarmanni.“

„Þetta voru bara mannleg mistök hjá samfélagsmiðlateyminu,“ segir Jóhann.

Ekkert komið úr forsetakosningasjóðnum

Helga Lára Haarde, einn af eigendum forsetakosningasjóðsins, segir að engir fjármunir séu inn á þeim sjóði og að hann hafi aðeins verið ætlaður forsetakosningunum.

„Það er bara núll, það er engin hreyfing í bankanum. Það hefur ekkert farið inn og það hefur ekkert komið út síðan framboðið var gert upp,“ segir Helga í samtali við mbl.is.