Nýir eigendur Pylsuvagnsins

„Við erum fyrst og fremst að fjárfesta í vel reknu fyrirtæki og einu helsta kennileitinu hér á Selfossi,“ segir Fjóla Steindóra Kristinsdóttir á Selfossi.

Fyrir helgina var gengið frá sölu á Pylsuvagninum þar í bæ sem Ingunn Guðmundsdóttir hefur átt og rekið í áratugi. Staðurinn nýtur vinsælda og er fjölsóttur, enda þykja skyndiréttirnir sem þar eru seldir hafa sitt sérstaka bragð og gæði.

Má þar nefna pylsur, samlokur, hamborgara og margvíslegt annað góðmeti. Opnunartíminn er langur og fáir snúa svangir frá.